Tingbafuo Davide imi Goriata, Bakindo Saura amoi Davide ko naangera kurii gako riivura. Davide aima so dungu avura ki dibehe, na dungu aboro ki iniko. Agu aregbo Davide anaayego ba vura yo, adee anaaye ki ta dogbere ni bi bia nga: ‘Saura imi akutu, na Davide ki imi bawe akutu!’ Saura atona ka kpi Davide na ki idi ka imo ko.

Davide aima rengba ka ta kundi wenengai. Rogo kura uru sa, ho Davide aata kundi ni fu Saura, Bakindo Saura azumu Davide na gako baso. Davide ane gu baso re ni ipo na gu baso re ki so kina vuro bambu. Fuo gure, Saura aˈasadi bara dunguhe ka imo Davide. Niyangaraha, Davide aoro na ki gbu rogo ngbi ngume.

Saura adi riivura nga ga akumba bangeyo adu nga 3,000 ki ndu ka ta tipa Davide. Ko arimi ku rugo gu siimbia nga gu  Davide na gako akumba agbu rogoho. Ga Davide akumba ki ya fuko rogo patapata nga: ‘Gere nga momu foro mo imi Saura.’ Davide apita koyo du bakindo Saura ni na ki yere ngba ga ko roko. Saura aainongo ho te. Tingbafuo gure, rago agberẽ ti Davide ni kerehe nga ko aayugonga iriso fu ga Yekova mbedimbedi bakindo te. Ko aaidanga ha fu gako akumba i zubo Saura te. Ko ayambu Saura nitiko ki ya, ko aima rengba ka imo ko ho ko agbia momu ni. Ya mo Saura aˈaria berã ko ti Davide?

Oó. Saura aata tipa ko kindi. Rogo yuru sa, Davide na gume ko nga Abisai andu ku rogo ga Saura bataya zanga boro inihe. Zavura Abinera nga gu boro naabanda Saura aara ara. Abisai aya: ‘Gere nga momu furani! Mo idihe fere mi imiko.’ Davide akaragapai nga: ‘Yekova nika mangapai na ko. Ani di kina gako baso na gako ndukura ime ki ndu.’

Davide adakpa gu bagangara naadu mbembedi na ga Saura bataya. Ko ki poi kuari ki ya: ‘Abinera, tipagine mo naabandanga gamo bakindo ti ni ya? Ga Saura ndukura ime gbiati baso wari?’ Saura aini fogo Davide na ki ya: ‘Ka mo ima imo re, ono mo naimongo re te. Mi ima inoho nga mo nika du ni gu ue bakindo nga ga Yisaraere.’ Saura akaraga tiko ku kpuko yo. Ono anga ga Saura aborokporo dunduko nasogo Davide te.