Después ni David bigaity Goliat, Saúl golú láabu par nasanirbu nisló guirá soldad ni gopbu. David buny gan ló xidal guerr né guirá buñ bimbu láabu. Órni David bibiguet ló guerr, buñgonaʼ cuacuent láabu cayaʼ né cayoʼol canción ni ná scareʼ: «¡Saúl ma bigaity xidal mil, per David ma bigaity más de chii mil!». Saúl nigolú bidzuitzbu né goniiny nagaitybu David.

David biscoʼoltzay arpa. Toibtica dzú laʼga David cascoʼol arpa par guicadiag Saúl, láabu golísbu toib lanza né bisalbu láani loguiaʼ David. Órcuca birecueʼ David, né lanzacu cuáni cueʼ yoʼ. Después de ngú, xidal buelt goniiny Saúl nagaity láabu. Bidxin midid, David bixony né see ló yoovich.

Saúl bitop midid 3.000 soldad par guinásyibu David. Saúl diti biduidy cuent  né goyoʼ lainy toib bileʼ ro nacachlan David né guirá soldad. Layibu nalandiguié gochyibu David: «Nigoreʼ labúu guigaitylo Saúl». David bibigax né bichoc tlaʼ xhap Saúl né Saúl diti biduidy cuent. Después, David nigolú gosac mal por ni diti gopbu respet buñguieeu ni Jehová golú par gony mandary. Láabu diti biduidybu lagary que xpiimbu nagaity Saúl. Órni Saúl bireʼ lainy bileʼcu, David bicaʼ rudx né góoch láabu: «Nagaa labúu nagati looy per diti buni láani». Xpensarylo, ¿ma diti bianladx Saúl a David la?

Yaca. Saúl nábu nagaityrabu David. Toibtica goxin David né xiacbu Abisai goyoʼ nagachyibu ronoʼ Saúl né guirá soldad. Dada Abner, toib buñguieeu ni rap Saúl, nigolú natiasybu ór cú. Abisai gochbu David: «¡Nigoreʼ xorni! Biduidy lagary guigaity láabu». David cuapy: «Xcuent Jehová noʼbu. Nosi cuaʼ lanza xtunybu né ruʼ xtunybu né yoʼ».

David biaʼpy guic toib dainy ni goyoʼ gahxca ro labúu bienlóobu Saúl né guirá soldad. Né bicaʼbu rudx: «Abner, ¿xigony diti gonlo rey David? ¿Pu noʼ ruʼ ro rioʼ xinísbu né lanza xtunybu?». Saúl bimbu xtiitz David né goniʼbu: «Labúu nagaitylo naʼ, per diti bunylo láani. Naana que sadxin dzú sony mandarylo gudx Israel». Saúl bibiguet lidx. Per diti guirá xfamily Saúl bianladx a David.