Yonathan ubino wod Saul ma kayu, man ebino jasuda ma won tegocwiny. Daudi uwacu nia kum Yonathan ubino rep nisagu acur, man ebino tek nisagu umvor. Ceng’ acel, Yonathan uneno basuda moko mi Jufilisti iwi got moko. Ewacu ni jayei jamlwiny pare kumae: ‘Wabicaku lwiny i dhoggi ka Yehova umio iwa giranyutha moko. Tek Jufilisti giyero nia wacidh i bang’gi, e wabing’eyo nia saa mi caku lwiny i dhoggi uromo.’ Jufilisti gigam gikok kumae: ‘Wuidh i bang’wa kuni kara wakied lwiny wakudwu!’ E Yonathan giku jayei jamlwiny pare giidho iwi got man ginego basuda 20.

Calu ma Yonathan ubino wod Saul ma kayu, nwang’u en re m’eromo doko ubimo kaka won. Re Yehova ung’io Daudi re m’ubed ubimo mir Israel. Yonathan ung’eyo lembe maeno cuu, ento kumira unege ngo. Yonathan giku Daudi gidoko jurimo ma ceng’ini mandha.  Ng’atuman ung’olo ni wadi nia ebigwoke man ebicero bang’e. Yonathan uting’o bongu pare, palamularu, atum man mukaba pare emio ni Daudi.

Kinde ma Daudi ubino ringo Saul, Yonathan ucidho i bang’e man eyero ire kumae: ‘Bed tek man bed ku tegocwiny. In re ma Yehova ung’ii nibedo ubimo. Baba de ung’eyo lembe maeni cuu.’ Nyo in de imaru ibed ku jarimo ma ve Yonathan?

Wang’ dupa, Yonathan uboth ku tho pi nikonyo jarimbe. Eng’eyo nia won ma Saul ubemito nego Daudi, e ewacu ire kumae: ‘Daudi ukoso ngo; kan inege, nwang’u itimo dubo.’ Kwinyo umaku Saul lee mandha i kum Yonathan. Oro moko i ng’eye, Saul giku Yonathan zoo githo i lwiny karacelo.

I ng’ei tho pa Yonathan, Daudi uyenyo kaka Mefiboceth ma wod Yonathan. Kinde ma Daudi unwang’u Mefiboceth, ewacu ire kumae: ‘Wuru bino jarimba ma ceng’ini mandha; dong’ abigwoki i kwo peri zoo. Ibibedo i pacu para man ibibecamu i dhu meza para.’ Wi Daudi uwil ungo nyanok de pi Yonathan.