Saúl reyin Jonatán sat jilïr yoqapajj jan ajjsarir soldadönwa. ‘Jonatanajj pakanakat sipansa jukʼampi jalirïnwa, leonanakat sipansa jukʼamp chʼamanirakïnwa’ sasaw Davidajj säna. Mä urojja Jonatanajj filisteo soldadonakaruw mä qollu patjjan uñjäna. Armadurap apirirojj akham sänwa: ‘Jehová Diosajj mä señal churistani ukhakiw jupanakamp nuwasiñäni. Filisteonakatejj makatanipjjam sapjjestani ukhakiw nuwasir sarañäni’ sasa. Filisteonakajj ‘¡nuwasir makatanipjjam!’ sasaw artʼanipjjäna. Ukatwa Jonatanampi armadura apiripampejj makatapjjäna, 20 soldadonakaruw atipjapjjarakïna.

Jonatanajj jilïr wawjamajj jupaw Sauljjarojj reyëjjañapäna. Ukampis Jehová Diosajj Davidaruw Israelan machaq reyipäñapatak ajllïna. Uk yatisajj janiw Jonatanajj envidiaskänti. Antisas Davidampejj wali suma amigöpjjänwa. Maynit mayniru jan walinakat jarkʼaqasiñatakiw mä promesa lurapjjarakïna. Jonatanajj amigopätap Davidar  uñachtʼayañatakejja, jan mangani patjja isipampi, espadapampi, flechtʼañ arcopampi, cinturonapampi regaläna.

Davidajj Saúl reyit escapaskäna ukhajja, Jonatanajj Davidar uñjiriw saräna, akham sarakïnwa: ‘Chʼamani saytʼasim, janirak ajjsaramti. Jehová Diosaw jumar reyïñamatak ajllistamjja. Tatajas uk sum yatiski’ sasa. ¿Jonatanjam suma amigonïñ munasmati?

Amigopar yanaptʼañ laykojja, Jonatanajj walja kutiw vidap niy aptʼasïna. Saulan Davidar jiwayañ munatap yatisajj akham sänwa: ‘Davidar jiwayasajj juchachasïtawa. Jupajj janiw kuna jan walsa lurkiti’ sasa. Saulajj walpun Jonatanatakejj colerasïna. Mä qhawqha maratjja, Saulampi Jonatanampejj mä guerranwa jiwjjapjjäna.

Jonatanajj jiwjjäna uka qhepatjja, Davidajj Jonatanan Mefibóset sat yoqaparuw thaqtanïna. Jikjjatäna ukhajj akham sänwa: ‘Tatamajj wali suma amigojänwa, jichhat uksarojj nayaw jumar cuidjjäma. Palaciojanwa jakasïta, mesajatwa manqʼasirakïta’ sasa. Davidajj janipuniw Jonatán amigopat armaskänti.