Man nu mañ nu Kiñe Saulô le Yônatan a bé mut gwét nu makénd. David a kal le Yônatan a bé hoo iloo nyôgôl, a ban-ga ngui iloo mbondo njéé. Kel yada, Yônatan a tehe 20 ma bisônda ma Lôk Filistia i ngii hikôa. A kal mut a bé begee bijôl gwé bi gwét le: ‘Di ga jôs bo ndik ngéda Yéhôva a ga ti bés yimbne. Ibale Lôk Filistia i nkal bés le di bet, ha nyen di ga yi le di jôs bo.’ I mbus, Lôk Filistia i lond: ‘Bedga nyono, di joo!’ Ni boba ba bet hikôa, ba bép bisônda bi.

Kiki a bé man nu mañ nu Saulô, Yônatan nyen a bé lama ba kiñe i mbus isañ. Ndi Yônatan a bé yi le Yéhôva a bi tep David i ba kiñe Israel i noñ; ndi to hala, a bi kil bé David njôñ. Yônatan bo David ba bé bañga mawanda. Ba bi nôgla le hi wada a mba  a nsôñ, a tadak ki nuu. Yônatan a ti David kôti yé, pansoñ yé, mpihlôngô wé ni ngôli yé kiki yimbne i gwéha.

Ngéda David a bé ke Saulô ngwéé, Yônatan a bi ke boma nye, a kal nye le: ‘Lédés, kon bañ woñi. Yéhôva a mpohol we inyu ba kiñe. Yak ta a nyi hala.’ Baa u gwé ngôñ i bana loñge liwanda kiki Yônatan?

Ngandak ngélé, Yônatan a bé le a nimis niñ yé inyu hôla liwanda jé. A bé yi le Kiñe Saulô a bé sômbôl nol David, jon a kal isañ le: ‘Ibale u nol David, wee u mboñ béba; a mboñ bé béba yo ki yo.’ Ndi Saulô a bi bep unbene Yônatan. I mbus ndék nwii, Saulô bo Yônatan ba bi wo i gwét.

Mbus nyemb Yônatan, David a bi yéñ man Yônatan le Méfibôset. Ngéda David a bi léba nye, a kal Méfibôset le: ‘Inyule isoñ a ba me bañga liwanda, m’a tééda we niñ yoñ yosôna. U ga niñ i yale yem, u je ki i téblé yem.’ David a mah bé hôya liwanda jé Yônatan.