Jonathan, mone njô bôte Saül, a mbe éwôlô mone bezimbi. David émien a nga jô na Jonathan a mbe a kele’e mbi avôl a dañe ndôé, a na, a mbe ngul a dañe ngbwengbwem. Môs éziñ, Jonathan a nga yene bezimbi 20 ya nkane bita Bephilistin be bete nkôl. Ane a nga jô nyô a mbe a be’e nye biôm mewosane na: ‘Bia ye ke wosane be nge Yéhôva a liti bia ndem. Nge Bephilistin be jô bia na bi bet, yeme na bia yiane wosane be.’ Ane Bephilistin be nga jô be na: ‘Za’ané bi wosa’an!’ Ane bôte bete bebaane be nga bet nkôl, a ke wosane Bephilistin.

Jonathan a mbe a yiane éto njôô amu a mbe ntôle fame Saül. Ja’a a mbe a yeme’e na Yéhôva a nga tobe David, a nji bo nye éviele. Jonathan ba David be mbe beta bemvôé. Môt ase ya  be be a nga ka’ale nyô mbo’o na, a ye kamane nye, a su’u nye. Jonathan a nga ve David biyé bié, nkpwaté mekône wé, mfane (arc) wé a asese dé; a liti’i valé na a nye’e nye.

Éyoñ David a mbe a tube Saül, Jonathan a nga ke koone nye, a jô nye na: ‘Bo’o ngu a ayo’o nlem. Yéhôva a tobeya wo na ô bo njôô. Ésa wom émien a yeme nalé.’ Wo fe wo kômbô bi avale mvôé ete nga?

Jonathan a nga fam awu abui biyoñ asu na a volô mvôé jé. A mbe a yeme’e na Saül a mbe a kômbô’ô wôé David, jôm ete nje a nga jô nye na: ‘Wo ye sem nge ô wôé David; amu a nji bo wo mbia jam éziñ.’ Ane Saül a nga wô’ô nye mbia ôlun. Mvus abui mimbu, Saül ba Jonathan be nga wu bita.

Éyoñ Jonathan a wuya, David a nga jeñe Mephibosheth, mone Jonathan. Éyoñ a yeneya nye, a nga jô nye na: ‘Ma ye ba’ale wo akekui awu amu bia ésa wôé bi mbe beta bemvôé. Wo ye nyiñe nda jam a di tebele wom.’ David a nji fo’o vuane mvôé jé môs éziñ.