Jonatán nünülia chi palajachikai nüchon Saúl, surulaat yalayalaa aaʼinchi nia. Nüküjain David kawachirain maʼin nia nuulia wanee warulapai otta katchinreeshia nia nuulia wanee wasashi. Soʼu wanee kaʼi, niʼrüin Jonatán waneinnua surulaat filisteo saaʼu wanee uuchi. «Ashuteena waya naaʼu müleka niiʼiyatüle wamüin Jeʼwaa wanee shiyaawase», nümaka nümüin chi surulaat nümaakai. «¡Jalaina jütkaai wamaa!», namaka na filisteokana. Noʼunaka saaʼu tü uuchikat piamaleʼe otta najaʼttiraka 20 surulaat filisteo.

Süka niain Jonatán chi palajachikai nüchon Saúl, niainjachi aluwataaka saaʼu Israel outapa chi nüshikai. Nütüjaapajaʼa aaʼu Jonatán niain David chi nüneekakai Maleiwa süpüla aluwatawaa saaʼu Israel otta nnojoishi nia achunjuin saaʼu tia. Aleewashi maʼin Jonatán nümaa David. Pansaasü nanüiki sünain nakaaliinjiraainjanain waneepia. Sutuma aleewain maʼin Jonatán nümaa  David, naapüin nümüin tü nüsheʼinkat, nüchajaruutse, wanee uraichi sümaa jatü otta wanee siʼira aainjuushi süka paaʼata.

Wanaa sümaa nuunjulaain David nuulia Saúl, chejeeshi Jonatán anaʼlaain nümüin. «Meimmoluinjachi pia otta yalayalainjatü paaʼin, nüneeküin pia Jeʼwaa süpüla puluwataain saaʼu Israel. Jaʼitakajeʼe chi tashikai, nütüjaa aaʼu tia», nümaka nümüin David. ¿Pücheküin müinjachin wanee paʼaleewain maʼaka naaʼin Jonatán?

Kojuyatua nükaaliinjain Jonatán chi naʼaleewainkai, mayaapejeʼe eein süpüla nuʼutünüin aaʼin. Nütüjaa aaʼu Jonatán nuʼutüneein aaʼin David nutuma Saúl. «Kaainjaleechi pia müleka puʼutüle naaʼin David. Nnojotsü kasain naainjalain David», nümaka Jonatán nümüin chi nüshikai. Jashichishaatashi Saúl nümüin Jonatán. Maʼaka jeʼra juya mapa, oʼutuna aaʼinchi Saúl nümaʼaleʼeya Jonatán sünain wanee atkawaa.

Outapa Jonatán, nüchajaain David wanee nüchon kanüliakai Mefibóset. «Takaaliinjeechi pia waneepia süka taʼaleewainpuʼuin maʼin chi püshikai. Kepieechi pia eere taluwataain otta joyoteechi pia tamaa sünain ekawaa», nümaka nümüin. Nnojoishi motuin naaʼin David chi naʼaleewainkai.