Ang subang nga bata ni Hari Saul, nga si Jonatan, isa ka maisog nga soldado. Si David nagsiling nga si Jonatan mas madasig pa sa agila kag mas makusog sa leon. Isa ka adlaw, nakita ni Jonatan ang 20 ka Filistinhon nga soldado sa bungyod. Ginsilingan niya ang iya manugdala sing hinganiban: ‘Salakayon lamang naton sila kon hatagan kita ni Jehova sing palatandaan. Kon pataklaron kita sang mga Filistinhon, buot silingon salakayon naton sila.’ Ang mga Filistinhon nagsinggit: ‘Taklad kamo diri kag maaway kita!’ Gani nagtaklad sila nga duha kag napierde nila ang mga soldado.

Si Jonatan ang subang nga bata ni Saul, gani sia kuntani ang masunod nga hari. Pero nahibaluan ni Jonatan nga si David ang ginpili ni Jehova nga mangin masunod nga hari sang Israel. Bisan pa sa sini, wala nahisa si Jonatan kay David. Nangin suod gid nga mag-abyan si Jonatan kag si David. Nagpromisa sila nga proteksionan  kag pangapinan nila ang isa kag isa. Ginhatag ni Jonatan ang iya bayo, espada, pana, kag paha kay David bilang tanda sang ila pag-abyanay.

Sang nagapalagyo si David kay Saul, ginkadtuan sia ni Jonatan kag ginsilingan: ‘Magpakabakod ka kag magpakaisog. Si Jehova ang nagpili sa imo nga mangin hari. Bisan ang akon amay nakahibalo sina.’ Gusto mo man bala sing abyan nga pareho kay Jonatan?

Indi lang makaisa nga ginrisgo ni Jonatan ang iya kabuhi para buligan ang iya abyan. Nahibaluan niya nga gusto patyon ni Hari Saul si David, gani nagsiling sia sa iya amay: ‘Sala gid nga patyon mo si David; wala sia sing malain nga nahimo.’ Naakig gid si Saul kay Jonatan. Pagligad sang pila ka tuig, napatay si Saul kag si Jonatan sa inaway.

Sang napatay si Jonatan, ginpangita ni David ang bata ni Jonatan nga si Mefiboset. Sang nakita sia ni David, ginsilingan niya ini: ‘Bangod suod ko gid nga abyan ang imo amay, atipanon ko ikaw sa bilog mo nga kabuhi. Magaistar ka sa akon palasyo kag magakaon sa akon lamesa.’ Wala gid nalipatan ni David ang iya abyan nga si Jonatan.