Jonatan, pi gran pitit gason Sayil la, te yon sòlda ki brav. David te di Jonatan pi rapid pase èg e li gen plis fòs pase lyon. Yon jou, Jonatan te wè kèk sòlda peyi Filisti sou yon ti mòn. Li di sèvitè ki t ap pote zam li yo: ‘N ap atake yo si sèlman Jewova ban nou yon siy. Si sòlda peyi Filisti yo di nou monte, n ap konnen nou ka atake yo.’ Sòlda Filisti yo te di byen fò: ‘Monte vin goumen!’ Se konsa, de mesye yo monte ti mòn nan e yo te touye 20 sòlda.

Piske Jonatan se te pi gran pitit gason Sayil, se li ki t apral vin wa. Men, Jonatan te konnen se David Jewova te chwazi kòm pwochen wa ann Izrayèl. Aktout sa, li pa t jalou. Jonatan ak David te vin bon zanmi. Yo te pwomèt youn ap pwoteje lòt  e youn ap defann lòt. Pou Jonatan montre David jan l zanmi l, Jonatan te bay David manto l, epe l, banza l ak senti l.

Lè David t ap kouri pou Sayil, Jonatan t al kote l e li di l: ‘Mete fòs sou ou, pran kouraj. Se ou menm Jewova chwazi kòm wa. Menm papa m konn sa.’ Èske w ta renmen gen yon bon zanmi tankou Jonatan?

Pandan plizyè fwa, Jonatan te riske lavi l pou l ede zanmi l lan. Li te konnen wa Sayil te vle touye David, se sa k fè li te di papa l: ‘W ap peche si w touye David paske li pa fè anyen ki mal.’ Sayil te fache anpil sou Jonatan. Kèk ane apre, Sayil ak Jonatan te mouri nan lagè.

Apre lanmò Jonatan, David te chèche Mefibochèt, pitit gason Jonatan. Lè David jwenn Mefibochèt, li di l: ‘Piske papa w te bon zanmi m, m ap pran swen w pou tout rès vi w. Ou pral viv nan palè m nan e w ap manje sou tab mwen.’ David pa t janm bliye Jonatan, zanmi l lan.