Jonatan, anak tuai Raja Saul, seiku soldadu ti berani. David madah Jonatan lengkas agi ari menaul, kering agi ari singa. Bisi sekali, Jonatan meda sekeda soldadu Pilistin ba atas bukit. Iya madah ngagai soldadu ke megai senyata ke iya: ‘Kitai deka nyerang sida enti Jehovah meri siti tanda. Enti orang Pilistin ngangauka tua mansang ngagai sida, nya baru tua ulih ngelaban sida.’ Soldadu Pilistin manjung: ‘Datai kitu!’ Nyadi Jonatan enggau soldadu iya niki bukit lalu ngalahka 20 iku soldadu nya.

Ketegal Jonatan anak tuai Saul, iya patut nyadi raja pengudah Saul. Tang Jonatan nemu Jehovah udah milih David nyadi raja baru Israel. Taja pia, iya enda chemburu. Jonatan enggau David nyadi pangan ti rapat. Seduai iya besemaya deka nyaga sereta  ngelindung pangan diri. Jonatan meri baju kebal, pedang, panah enggau belulang iya ngagai David nyadika tanda kaul seduai iya.

Lebuh David ngerarika diri ari Saul, Jonatan betemu enggau iya lalu madah: ‘Nyadi kering sereta berani. Jehovah udah milih nuan nyadi raja. Apai aku pan nemu pasal tu.’ Kati nuan deka bisi pangan ti manah baka Jonatan?

Lebih ari sekali, Jonatan berambunka nyawa diri kena nulung pangan iya. Iya nemu Raja Saul deka munuh David. Ku iya madahka apai iya: ‘Nuan deka ngaga penyalah enti nuan munuh David; iya nadai ngereja utai ti salah.’ Saul amat ringat ngagai Jonatan. Beberapa taun udah nya, Saul enggau Jonatan sama mati lebuh beperang.

Pengudah Jonatan mati, David ngiga anak Jonatan, Mepiboset. Lebuh David tetemuka iya, ku iya madahka Mepiboset: ‘Laban apai nuan pangan aku ti pemadu manah, aku deka ngibun nuan sepemanjai idup nuan. Nuan deka diau enggau aku ba istana lalu makai enggau aku.’ David seruran ingatka pangan iya Jonatan.