Natured a soldado ti inauna nga anak ni Ari Saul a ni Jonatan. Kinuna ni David a napaspaspas ni Jonatan ngem iti agila ken napigpigsa ngem iti leon. Maysa nga aldaw, nakakita ni Jonatan kadagiti soldado a Filisteo iti maysa a turod. Imbagana iti agaw-awit iti armasna: ‘Darupenta laeng ida no mangted ni Jehova iti pagilasinan. No ibaga dagiti Filisteo a sumang-atta, pagilasinan dayta a darupenta idan.’ Impukkaw dagiti Filisteo: ‘Sumang-atkayo ket aglalabantayo!’ Isu a simmang-at da Jonatan iti turod ket inabakda ti 20 a soldado.

Gapu ta ni Jonatan ti inauna nga anak ni Saul, isu koma ti sumaruno nga agbalin nga ari. Ngem ammona a ni David ti pinili ni Jehova nga agbalin nga ari ti Israel. Uray no kasta, saan a nagimon. Nagbalinda a nadekket nga aggayyem ken David. Inkarida a protektaran ken  idepensada ti maysa ken maysa. Inted ni Jonatan ken David ti bado, espada, pana, ken sinturonna kas pagilasinan ti panaggayyemda.

Idi lemlemmengan ni David ni Saul, napan ni Jonatan ken David ket imbagana: ‘Dika agbuteng. Papigsaem ti pakinakemmo. Pinilinaka ni Jehova nga agbalin nga ari. Uray ni amak, ammona dayta.’ Kayatmo kadi nga adda met gayyemmo a kas ken Jonatan?

Saan laeng a namnaminsan nga insebba ni Jonatan ti biagna tapno matulonganna ti gayyemna. Ammona a kayat ni Ari Saul a patayen ni David, isu a kinunana ken amana: ‘Agbasolka no patayem ni David. Awan ti dakes nga inaramidna.’ Nakaunget ni Saul ken Jonatan. Kalpasan ti sumagmamano a tawen, natay da Saul ken Jonatan iti gubat.

Idi natay ni Jonatan, binirok ni David ti anakna a ni Mefiboset. Idi nabirokanna, imbagana ken Mefiboset: ‘Nakaim-imbag a gayyem ni amam, isu a tulonganka bayat a sibibiagka. Agyanka iti palasiok ken manganka iti lamisaanko.’ Saan a pulos linipat ni David ti gayyemna a ni Jonatan.