Mwana ya ntotila Saule ya ntete, Yonatani, vandaka soda ya kikesa. Davidi tubaka nde Yonatani vandaka ntinu kuluta ngo-zulu mpi ngolo kuluta ntambu. Kilumbu mosi, Yonatani monaka basoda ya Filistia 20 na ngumba mosi ya fioti. Yandi songaka muntu yina vandaka kunatila yandi binwaninu nde: ‘Beto ta nwanisa bo kaka kana Yehowa kupesa beto kidimbu. Kana bantu ya Filistia kusonga beto na kukwisa, pana beto ta nwanisa bo.’ Bantu ya Filistia tubaka na ndinga ya ngolo nde: ‘Beno kwisa kunwana!’ Bo zole mataka na ka ngumba yina mpi nungaka basoda ya Filistia.

Sambu Yonatani vandaka mwana ya Saule ya ntete, yandi zolaka kuvanda ntotila ya zole ya Izraele. Kansi Yonatani zabaka nde Yehowa ponaka Davidi na kuvanda ntotila ya zole ya Izraele, ata mpidina yandi vandaka ve ti kimpala. Yonatani ti Davidi kumaka banduku ya ngolo. Bo salaka lusilu nde Yonatani ta tanina mpi ta kotila Davidi mpi Davidi ta  sala mutindu mosi sambu na Yonatani. Yonatani pesaka Davidi kazaka, mbele ya bitumba, munduki ya tolo-tolo, mpi mukaba na yandi bonso kidimbu ya kinduku na bo.

Ntangu Davidi vandaka kutina Saule, Yonatani kwendaka kukutana ti yandi mpi tubaka nde: ‘Vanda ngolo mpi vanda kikesa. Yehowa me pona nge na kuvanda ntotila. Ata papa na mono me zaba yo.’ Keti nge ta zola kuvanda ti nduku ya mbote bonso Yonatani?

Bambala mingi, Yonatani tulaka luzingu na yandi na kigonsa sambu na kusadisa nduku na yandi. Yandi zabaka nde ntotila Saule vandaka kusosa kufwa Davidi, yo yina yandi songaka papa na yandi nde: ‘Yo ta vanda disumu sambu na nge kana nge fwa Davidi; yandi me sala ve ata kima mosi ya mbi.’ Saule wilaka Yonatani makasi. Mwa bamvula na nima, Saule ti Yonatani fwaka kilumbu mosi na bitumba.

Ntangu Yonatani fwaka, Davidi sosaka Mefibosheti, mwana ya Yonatani. Ntangu Davidi monaka yandi, yandi songaka Mefibosheti nde: ‘Sambu tata na nge vandaka nduku na mono ya ngolo, mono ta kebaka nge luzingu na nge ya mvimba. Nge ta zingaka na nzo na mono mpi ta diaka na mesa na mono.’ Davidi vilaka ve ata fioti nduku na yandi Yonatani.