O mona ua dianga ua Sobha Saulu, Jonata uexile diiala dia nguzu. Davidi uambe kuila Jonata uexile diiala dia lenguluka o holokoko ndenge, o nguzu iê ia betele-o-kota o hoji ndenge. Saí kizuua, Jonata ua mono 20 a masoladi akua Fídixia, ku thandu dia mulundu. Muéne uambela o kapanga kê: ‘Etu tua-nda luua na-u ngó, se Jihova u tu bhana kijimbuete. Se akua Fídixia a tu tangela phala kubanda, etu tuejiia kiá kiebhi ki tua-nda kua buikisa.’ Akua Fídixia a dikola: ‘Bandenu phala kubhânga!’ Mu kithangana kienhokio, o kiiadi kia mala a bande o mulundu ia a tolola o masoladi.

Kuma muéne uexile o mona ua dianga ua Saulu, Jonata ueji bhingana Saulu ku usobha. Jonata uejidile kuila, Jihova ua solele Davidi phala kukala o sobha ia Izalaiele, maji né kiki, ka kexile ni luimbi. Jonata ni Davidi akexile ni ukamba uambote. Ene a di kanena kuila, eji dikuatekesa ni ku dilanga. Jonata ua bhana kua Davidi  o divunga diê, xibhata, mufula, ni phonda iê kala ijimbuete ia ukamba uâ.

Kioso Davidi kia kexile mu lenga Saulu, Jonata ua mu tangela uixi: ‘Kala u kindanda, u suíne muene. Jihova ua ku solo eie, phala kukala sobha. Né muene tat’etu, uejiia o kidi kiki.’ O kuila ua mesena kukala ni dikamba dia kazola kala Jonata?

Mu veji javulu, Jonata ua te o muenhu uê mu iluezu phala kubhulula kamba diê. Muéne uejiidile kuila, o Sobha Saulu ua mesenene kujibha Davidi, muéne uambela tat’ê: ‘Kia-nda kala kituxi se ujibha Davidi, mukonda muéne ka bhange kima kiaiibha.’ Saulu ua dizangala ni Jonata. Mu kubhita mivu, Saulu ni Jonata afu kizuua kimoxi mu ita.

Kioso kiafu Jonata, Davidi uai mu sota mon’â Jonata Mefibozete. Kioso Davidi kia mu sange, ua tangela Mefibozete: ‘Kuma tat’enu uexile kamba diami dia kazola, eme nga-nda ku tambula konda ku muenhu ué uoso. Eie ua-nda tunga mu mbonge iami, ni kudia ku meza iami.’ Davidi nuka ua jimbile kamba diê dia kazola Jonata.