Mwanaa wamushimani yomuhulu ka kufitisisa wa mulena Saule, yena Jonatani, neli ndwalume yabundume. Davida naabulezi kuli Jonatani naafita mbande kwa lubilo mi naafita tau kwa maata. Zazi leliñwi, Jonatani abona masole ba Mafilisita ba 20 fa lilundu. Kihaa li ku mulwali wa lilwaniso zahae: ‘Luka balwanisa haiba feela Jehova alufa sisupo. Haiba Mafilisita balubulelela kuli luye luyo balwanisa, fo kipeto lukaya kuyo balwanisa.’ Mafilisita bahuwa kuli: ‘Hamukambamele kwanu luto lwana!’ Kacwalo, baana bababeli bao bakambama lilundu mi bayo tula masole bao.

Bakeñisa kuli Jonatani neli yena mwana yomuhulu ka kufitisisa wa Saule, naakona kuba mulena yatatama. Kono Jonatani naaziba kuli Jehova naaketile Davida kuba yena mulena yanaaka tatama wa Isilaele;  nihakulicwalo, Jonatani naasika utwela muna Davida. Jonatani ni Davida baba balikani babatuna. Nebalumelelani kuli nebaka babalelana ni kuyemela yomuñwi ni yomuñwi. Jonatani naafile Davida koti yahae, mukwale, buta, ni lukanda sina sisupo sa bulikani bwabona.

Davida hanaabaleha kusaba Saule, Jonatani naaile ku yena ni kumutaluseza kuli: ‘Utiye mi ube ni bundume. Jehova ukuketile kuba mulena. Nihaiba bo ndate baziba cwalo.’ Kana nemuka tabela kuba ni mulikani yomunde sina Jonatani?

Hañata-ñata, Jonatani naabeyanga bupilo bwahae mwa lubeta kuli atuse mulikanaa hae. Naaziba kuli Mulena Saule naabata kubulaya Davida, kacwalo kihaa li ku ndatahe: ‘Ukaeza sibi haiba ubulaya Davida; hakuna zafosize.’ Saule anyemela hahulu Jonatani. Hamulaho wa lilimo, Saule ni Jonatani bashwela hamoho mwa ndwa.

Hamulaho wa lifu la Jonatani, Davida abata mwanaa Jonatani wamushimani yabizwa Mefibosheti. Davida hanaafumani Mefibosheti, ali ku yena: ‘Bakeñisa kuli ndataho neli mulikanaaka yomunde, nika kubabalela mwahalaa bupilo bwahao kaufela. Ukapila mwa ndu yaka mi ukacanga lico kwa tafule yaka.’ Davida naasika libala mulikanaa hae Jonatani.