Jonatán tbʼi tnejel tkʼwaʼl Saúl ex mintiʼ tzaj xobʼ toj qʼoj. Tqʼama David qa mas nim tikʼ Jonatán twitz jun tʼiw ex mas nim tipun twitz jun león. Jun qʼij, ok tqʼoʼn Jonatán twitz kyiʼj junjun kysoldad aj Filisteo twiʼ jun witz. Tuʼntzunju, tqʼama jlu teju onil tiʼj toj qʼoj: «Oʼkx qo okel tzoqpaj kyiʼj qa ma tzaj tyekʼin Jehová jun señ qe. Qa ma tzaj kyqʼamaʼn aj Filisteo tuʼn qjax, oktzun qo jawix qʼojil». E jawtzun ẍchʼin aj Filisteo ex kyqʼama: «Kytzaje max tzalu qukʼile». Jaxtzun Jonatán tukʼilju xqʼuqil te twi witz ex kubʼ 20 soldad kyuʼn.

Attoq toklen Jonatán tuʼn tok te aj kawil aj tkyim ttat tuʼnju a tnejel kʼwaʼl. Noqtzun tuʼnj, ojtzqiʼntoq tuʼn Jonatán qa otoq jaw tskʼoʼn Jehová David tuʼn tok te juntl aj kawil toj tnam Jerusalén, mintiʼ tzaj tqʼoj Jonatán  tiʼj David. Aju bʼant tuʼn, ok kyamiwen kyibʼ tukʼil David. Kubʼ kytziyen tuʼn tkolin jun tiʼj juntl. Tuʼn tkubʼ kyyekʼin qa tbʼanel amiw qe, xi tqʼoʼn Jonatán t-ẍjoʼw, tspad, xobʼil tplech, ex aju kʼalbʼil tkʼuʼj te David.

Tej el oq David twitz Saúl, xiʼ Jonatán keʼyil te ex tqʼama jlu te: «Il tiʼj tuʼn tten tipuna ex tuʼn miʼn ttzaj xobʼa. A Jehová ma jaw skʼonte teya tuʼn toka te juntl aj kawil. Axpe ikx, bʼiʼn jlu tuʼn nmane». ¿Taj teya tuʼn tten jun tbʼanel tamiwa ik tzeʼn Jonatán?

Nim maj xi tqʼon tibʼ Jonatán tuʼn tkyim tuʼntzun tkolin tiʼj tamiw. Ojtzqiʼntoq tuʼn Jonatán qa tajtoq tman tuʼn tkubʼ tbʼyoʼn David, tuʼntzunju, xi tqʼamaʼn jlu te: «Qa ma kubʼ tbʼyoʼna David, kbʼel tbʼinchaʼna jun matij il. Mintiʼ jun nya bʼaʼn ma bʼant tuʼn». Tzaj nim tqʼoj Saúl tiʼj Jonatán. Tej tikʼ junjuntl abʼqʼi, kyim Saúl junx tukʼil Jonatán toj jun qʼoj.

Tej tkyim Jonatán, xiʼ David jyolte Mefibóset, aju tkyʼajal Jonatán. Tej tkanet tuʼn, xi tqʼamaʼn jlu te: «Kʼokil xqʼuqina wuʼne, tuʼnju ok tmana te jun tbʼanel wamiwe. Kʼanqʼila toj ja jatumel in chin kawine ex ax kwaʼla tiʼj nmese». Kukx tzaj tnaʼn David Jonatán, aju tbʼanel tamiw.