Yonatani umwana umukalambapo uwa mwene Saulo wali umusilika umusipe. Devedi walanzile ukuti Yonatani wali umucincile ukucila cembe nupya wali na amaka ukucila cisama. Uwanda umwi Yonatani waweni asilika Aina Filisiti 20 pa mwamba. Waneenyile uwamusendelanga ivyanzo ati: ‘Tumayazanza sile ndi cakuti Yeova watulanga icimanyililo. Ndi cakuti Aina Filisiti yatunena ati: “Izini kuno,” lyene tumayazanza.’ Aina Filisiti yapunzile iyati: ‘Izini kuno tulwe!’ Fwandi aonsi yaili yakwezile umwamba iyaya iyacimvya asilika.

Pa mulandu wakuti Yonatani wali umwana umukalambapo wakwe Saulo, aliwe wali nu kuya umwene uwalondelelapo. Nanti cakuti Yonatani wamanyile ukuti Yeova wasolwile Devedi ukuya umwene wa Ina Izlaeli uwalondelelapo, ataamuvwilile uzuwa. Yonatani na  Devedi yaali acuza apalamisye. Yalaine ukuti yalaacingililana. Yonatani wapeezile Devedi cakuzwala cakwe, lupanga, uulapwa nu musipi pa kulangilila ucuza uno yakweti.

Lino Devedi utukanga Saulo, Yonatani waile kuli aliwe nu kumuneena ati: ‘Devedi, uye umukome nupya uye umusipe. Yeova wakusoolola ukuya umwene. Na tata kwene wamanya vivyo.’ Uzye ungatemwa ukukwata cuza umusuma wakwe Yonatani?

Pa miku ingi, Yonatani wisile umi wakwe umu uzanzo pakuti aazwe cuza wakwe. Wamanyile ukuti umwene Saulo walondanga ukukoma Devedi, fwandi wanenyile isi ati: ‘Lulaya u luyembu ndi cakuti mwakoma Devedi; pasi icipe icili consi cino wacita.’ Saulo wasokiile sana Yonatani. Lino papisile imyaka Saulo na Yonatani yaafwilile pamwi mu ulwi.

Lino Yonatani wafwile, Devedi watandike ukulonda Mefibosyeti umwana wakwe Yonatani. Lino wamuzanyile wamunenyile ati: ‘Pa mulandu wakuti so wali acuza wane umusuma, ndakusakamala umi wako onsi. Ulaikala umwi sano lyane nu kulya pamwi nani.’ Devedi atatazile ailile Yonatani cuza wakwe.