Iokichpil Saúl akin tayekanaya motokaytiaya Jonatán, uan katka se tateuijkej yolchikauak. David kijtoj ke Jonatán okachi ijsiujka yaya ke se águila uan ke okachi chikauak katka ke se tekuani. Se tonal, Jonatán kinitak itech se tepekuapan 20 tateuianij filisteos. Yejua ika kiluij takat akin kiuikiliaya tein ika tateuiaya: “Tikinteuiskej sayoj komo Jiova techmatiltia maj tiyakan. Komo filisteos techiluiaj maj tipankisakan, tikmatiskej ke moneki tikinteuiskej”. Filisteos kintsajtsilijkej: “¡Xipankisakan uan touan ximoteuikan!”. Ompa Jonatán uan itapaleuijkauj pankiskej uan kinmiktijkej.

Kemej Jonatán katka iokichpil Saúl akin tayekanaya, yejua yeskia tekiuaj satepan ke ipopaj momikiliskia. Sayoj ke Jonatán kimatia ke Jiova kiixpejpenka David maj yejua yeskia tekiuaj itech xolal Israel, uan amo kinexikoluiaya. Jonatán uan David tel kuali mouikakej.  Motenkaujkej ke mopaleuiskiaj. Jonatán kimakak David itilmaj, iespada, iarco uan icinturón uan ijkon kinextij ke katkaj tasojiknimej.

Keman David kicholuijtinemia Saúl, Jonatán kiitato uan kiluij: “Ximoyolchikaua. Jiova mitsixpejpenak ximochiua xitekiuaj. Hasta nopopaj kuali kimati nejon”. ¿Tikuelitaskia tikpias se motasojikniuj kemej Jonatán?

Jonatán miakpa motemakak momikilis porin kinekia kipaleuis itasojikniuj. Yejua kimatia ke ipopaj, tekiuaj Saúl, kinekia kimiktis David, yejua ika kiluij: “Komo tikmiktia David, titajtakos. Yejua amo kichiuani nion teyi tein amo kuali”. Saúl tel kualanik iuan Jonatán. Seki xiujmej satepan, Saúl uan Jonatán momikilijkej itech se neteuilis.

Satepan ke Jonatán momikilij, David kitemoj Mefibóset, akin katka iokichpil Jonatán. Keman kiajsik, kiluij: “Nimitsyekpias nochi monemilis porin tel kuali nimouikaya iuan mopopaj. Tinemis nochan uan titakuas nouan”. David amo keman kielkauak itasojikniuj, Jonatán.