Mambo Sauri mwana wavo wo dangwe, Jonatani, wainga musoca wakacunga. Dhavidhi wakabvunja Jonatani kuti makasikirire ake aita inga o Hokotora zve kuvanga kwake kwaipinda mbhondoro. Njiku imweni , Jonatani wakavona 20 wo masoca wo vaFiristi muzvituka. Iyena wakati kuno mubeseri wake: ‘Ticazohwa na ivona kudari Jehovha akatipa citatijo. VaFiristi vakativunja kuti khwiranyi, takuzoziva zvokuita’. Ivona vakazomima veciti: ‘Viyanyi tifurane!’ Ngokudaro vanarume vaviri vakakhwira pa zvituka zve kakuvafura.

Ngokuita mwana wo dangwe wa Sauri, ndiyena waifanera kuva mambo anotevera. Asi Jonatani waizviziva kuti Jehovha wainga wasana Dhavidhi kuti ave mambo anotevera wo Iziraeri; asi aacainga no ushanje. Jonatani na Dhavidhi vainga no ushamwari wo cika ndi cikevo. Ivona vakatopangana kugwarirana no kubvikirana umwe no umweni. Jonatani wakatopa Dhavidhi  baci rake kamare, mupasha, uta no bhande rake inga citatijo co ushamwari wo cika ndi cikevo.

Dhavidhi paaitiza Sauri, Jonatani wakaenda kobhuya naye womubvunja kuti: ‘Ivai wakavanga zve wakacunga. Jehovha wasana iwewe kuti uve mambo. Na baba wangu vanozviziva.’ Waizodavo kuwana shamwari yakadari inga ndi Jonatani?

Kazinji, Jonatani waitodira pa ngozi upenyu wake kuti abesere shamwari yake. Iyena waizviziva kuti Mambo Sauri waida kuuraya Dhavidhi, wakabvunja babake kuti: ‘Caizova cishaishi kwamuri kuuraya Dhavidhi; aazivi kuita ciri cese cakashata.’ Sauri wakanyangajira Jonatani. Ku makore akazotevera, Sauri na Jonatani vakafa vese ku hondo.

Pasure po kufa ka Jonatani, Dhavidhi wakapsanga mwana wa Jonatani, Mefibhosheti. Dhavidhi paakamuwana, wakamubvunja kuti: ‘Ngokuti babako vakava shamwari yakanaka kondiri, ndicakusapota pa upenyu hwako hwese. Iwewe ucagara nainini pa nyumba pangu nokuha pa meza pangu.’ Dhavidhi aambozivi kukanganwa shamwari yake Jonatani.