Jonatan, omona wotyiveli wohamba Saulu ankho wakola omutima. David wati Jonatan ankho uhateka ngo nkhombe iya wakola omutima ngo nkhulika. Onthiki imwe, Jonatan nomukuatesiko wae avamono ova Filisteu 20 veli komphunda. Jonatan apopila omukuatesiko wae okuti: ‘Inkha ova Filisteu vetuihana opo tukalwe navo, otyo elekeso liokuti Jeova metukuatesako okufinda.’ Ngatyo umwe ova Filisteu valinga. Ova Filisteu avahimbika okuvekuela okuti: ‘Endyuei, londei opo tulwe!’ Ovalume vevali avahimbika okulonda komphunda avafindi omafualali aeho.

Mokonda Jonatan omona wotete wa Saulu, ankho oe omphinga youhamba. Mahi Jonatan kakalele nonkhi ankho utyii okuti Jeova waholovonale David opo akale ohamba yo Isilayeli. Jonatan na David avakala omapanga omanene. Ankho valinga omulao wokuliyakulila nokuliamena  kese umwe na mukuavo. Opo alekese okuti ankho omapanga, Jonatan aavela David otyikutu tyae, nomutunga, no nkhondyi, nepoha.

Etyi ankho David aholama Saulu, avelivasi vali na Jonatan emutolela okuti: ‘Kala tyapama, nokuakola omutima. Jeova wekuholovona opo ukale ohamba. Na tate utyii.’ Ove kuhande okukala nepanga nga Jonatan?

Ovikando ovinyingi Jonatan welipakele motyiponga opo akuateseko epanga liae. Etyi Jonatan etyinoñgonoka okuti Ohamba Saulu ihanda okuipaa David, Atolela tate yae okuti: ‘Molingi onkhali inkha wipaa David, una utupu etyi ekulinga tyapenga.’ Saulu anumana unene na Jonatan. Etyi palamba omanima amwe, Saulu na Jonatan avaipaelwa kovilwa.

Etyi Jonatan ankhia, David aovola omona wa Jonatan Mefibosete. Etyi David avasa Mefibosete emupopila okuti: ‘Mokonda Tate yove ankho epanga liange enene mandyikutekula alo kononkhia mbove. Una okukala naame mondyuo yange atuli nove komesa ike.’ David nalumwe alimbuile epanga liae Jonatan.