Yonasaani, omutabani omukuru ow’Omugabe Saulo, akaba ari emanzi rugambwa. Daudi akagira ngu Yonasaani akaba naarahuka okukira ishamba kandi ngu akaba aine amaani okukira ekicuncu. Eizooba rimwe Yonasaani akareeba abaserukare 20 b’Abafilistia aha rushozi. Akagambira omukwatsi w’eby’okurwanisa bye ati: ‘Nitwija kubarwanisa Yehova ku araatuhe akamanyiso. Abafilistia ku baraatugire ngu mwinamukye mwije obwo nibwo turaabarwanise.’ Abafilistia bakagamba n’eiraka rihango nibagira bati: ‘Nimwinamukye mwije turwane.’ Batyo abashaija babiri banyegyera aha rushozi baasingura abo baserukare.

Ahabw’okugira ngu Yonasaani akaba ari omutabani mukuru wa Saulo, niwe yaabaire naabaasa kukurataho kuba omugabe. Kwonka Yonasaani akaba naamanya ngu Yehova atooraine Daudi kuba omugabe wa Israeli  oraakurateho; kandi, akaba atamwiniire eihari. Yonasaani na Daudi bakaba nibakundana munonga. Buri omwe akaraganisa mugyenzi we kuguma naamurinda kandi naamushagika. Yonasaani akaha Daudi omunagiro gwe, rurara ye, obuta bwe, n’orukoba rwe nk’akamanyiso k’omukago gwabo.

Obu Daudi yaabaire naahunga Saulo, Yonasaani akagambira Daudi ati: ‘Guma, ogire obumanzi. Yehova akutooraine kuba omugabe. Na tata ekyo naakimanya.’ Nooyenda kugira omunywani ori nka Yonasaani?

Emirundi mingi, Yonasaani akata amagara ge omukabi kuhwera munywani we. Akaba naamanya ngu Omugabe Saulo naayenda kwita Daudi, n’ahabw’ekyo akagambira ishe ati: ‘Noija kuba waakora ekibi okwita Daudi; tihaine ekibi eki akozire.’ Saulo yaagirira Yonasaani ekiniga. Ku haahingwireho emyaka, Saulo na Yonasaani bakafeera omu rutaro.

Bwanyima ya Yonasaani kufa, Daudi akasherura Mefiboshesi mutabani wa Yonasaani. Daudi ku yaaherize kubona Mefiboshesi, akamugira ati: ‘Ahabw’okugira ngu sho akaba ari munywani wangye ow’ahamara, niinyija kukureeberera ebiro by’amagara gaawe byona. Noija kutuura omu kikaari kyangye kandi ogume nooriira aha meeza yangye.’ Daudi tareebirwe munywani we Yonasaani.