Mandaj Saulpaj punta churica Jonatán shutimi carca. Jonatanca mana manchaj alli macanacujmi carca. Chaimantami Davidca, ‘angata yalli vulajmi, leonta yalli fuerzayujmi can’ nirca. Shuj punllaca Jonatanca jahua lomapi filisteo soldadocuna cajtami ricurca. Paipaj escudota apajtaca, ‘Jehová Dios shuj señalta cujpillami macanacugrishun. Paicunapajman huichiyachun nijpica huichiyashunllami’ nirca. Filisteocunaca macanacungapaj huichiyamuichij nishpami caparircacuna. Chaimi Jonatán, paipaj escudota apaj runapish 20 soldadocunata huañuchirca.

Jonatanca Saulpaj punta churi cashcamantami paipaj yaya huañujpica pai mandana carca. Pero Davidta Israelpi catij mandaj cachunmi Jehová Dios agllashcata yacharca. Chaita yachashpapish paica mana envidiarcachu. Chaipaj randica Davidhuan alli amigomi tucurca. Paicunaca caishujmanta chaishujmanta cuidarinacushunmi nircacunami.  Jonatanca paipaj amigo cashcata ricuchingapajmi paipaj jahua churanata, espadata, arcota, chumbillirinatapish Davidman curca.

David Saulmanta miticushpa rijpica Jonatanca paita ricugrishpami, ‘mana manchaj, sinchimi cana cangui. Diosmi cantaca mandaj cachun agllashca. Ñuca yayapish chaitaca yachanmi’ nircami. Jonatanca alli amigomi carca. ¿Pai laya amigota charinata munanguimanchu?

Jonatanca huañunata yachashpapish achca cutinmi paipaj amigota ayudarca. Paica paipaj yaya Davidta huañuchisha nishcata yacharcami. Chaimantami yayataca, ‘Davidta huañuchishpaca juchapimi urmangui. Paica ima mana allitaca mana rurashcachu’ nirca. Chaimi Saulca paihuan pꞌiñarirca. Asha huatacuna qꞌuipaca Saulpish Jonatanpish shuj macanacuipimi huañurcacuna.

Jonatán huañushca qꞌuipaca paipaj churitami Davidca mashcarca. Paica Mefi-boset shutimi carca. Pai ricurijpica, ‘cambaj tucui causaipimi cuidasha. Cambaj yayaca ñucapaj alli amigomi carca. Ñucahuanmi causangui. Ñuca mezapimi micungui’ nircami. Davidca paipaj alli amigo Jonatán runataca manataj cungarircachu.