Saulpa kuraq wawanmi Jonatán karan, payqa mana manchakuq soldadon karan. Davidmi niran: “Jonatanqa ankamantapas aswan usqhaytan phawan, leonmantapas aswan kallpayoqmi”, nispa. Juj p’unchaymi Jonatanqa Filistea soldadokunata orqo patapi rikuran. Jinan escudo apaqninta niran: “Jehová Dios juj señalta qowasun chayqa, Filistea runakunawan maqanakusun”, nispa. Jinan chay soldadokunaqa niranku: “¡Jamuychis maqanakunanchispaq!”, nispa. Chaymi Jonatanqa escudo apaqninwan 20 soldadokunata wañuchiranku.

Jonatanqa Saulpa kuraq wawantaq karan chayqa paymi papan wañupuqtinqa rey kanan karan. Jonatanmi ichaqa yacharan Jehová Dios Israelpi rey kananpaq Davidta ajllasqanta, chaywanpas manan envidiakuranchu. Aswanmi Jonatanqa Davidwan amigontin kapuranku. Prometerankutaq yanapanakunankupaq. Jinaspapas  Davidpa amigon kasqanta rikuchinanpaqmi p’achanta, espadanta, arconta, cinturonnintawan Davidman qoran.

Saulmanta David ayqeshaqtinpas Jonatanqa payta maskhaq rispan niran: “Kallpachakuy, ama manchakuychu. Jehová Diosmi ajllarasunki rey kanaykipaq. Papaypas chaytaqa yachanmi”, nispa. ¿Munawaqchu chhayna amigoyoq kayta?

Jonatanqa askha kutipin vidanta peligropi churaran amigonta yanapananpaq. Yacharanmi papan Saúl Davidta wañuchiy munasqanta, jinan niran: “Davidta wañuchispaqa juchallikunkin. Manan ima mana allintapas ruwanchu”, nispa. Chaymi Saulqa Jonatanpaq phiñakuran. Qhepamanmi Saulpas Jonatanpas guerrapi wañupuranku.

Jonatanpa wañupusqan qhepamanmi Davidqa Mefiboset-ta maskharan, payqa Jonatanpa wawanmi karan. Tarispataq niran: “Papaykin amigoy karan chaymi wañupunaykikama cuidasayki, palacioypin tiyanki, mesaypitaqmi mijunkipas”, nispa. Davidqa manan jayk’aqpas amigonta qonqaranchu.