Saulpa punda churica Jonatanmi carca. Paica na manllashpa macanajunata ali yachajmi carca. Jonatanmanda parlashpaca Davidca nircami: ‘Jatun angatapash yali ñapash calpaj, leongunatapash yali shinllimi carca’ nishpa. Shuj punllaca Jonatanga Filistea llactamanda soldadocuna loma jahuapi shayanajujta ricushpami, macanajuna espadata, escudota apashpa purij paita sirvij runataca cashna nirca: Paicunahuanga macanajushunllami. Shinapash chai filisteocuna ‘vichai shamuichilla nijpillami, paicunapaman vichai rishun’. Shinami Jehová Dios paicunata ñucanchi maquipi churashcata yachashun nishpa. Chai jipaca filisteo runacunaca cashnami nirca: Macanajungapaj vichai shamuichi nishpa. Chaimi Jonatanbash, paita sirvij runapash vichai rishpa ‘ishcai chunga filisteocunata catishpa huañuchirca’.

Saulpa punda churi caimandaca Saúl huañujpica, Jonatanmi israelitacunapa rey tucuna carca. Shinapash Saulpa jipa rey cachun, Jehová Dios Davidta agllashcataca Jonatanga alimi yacharca. Chaimandami Jonatanga, Davidtaca na envidiarca. Chaipa randica Jonatanga, Davidhuan ali ali amigocuna tucushpami cashna nirca, pipash llaquichingapaj munajpipash ishcandimandami ayudarishun nishpa. Shina ali  amigocuna cashcata ricuchingapami ‘Jonatanga, jahualla pai churajushcata Ilujchishpa, paipa espadatapash, pai macanajuna arcotapash, pai chumbilirina caratapashmi Davidman cararca’.

Saúl huañuchingapaj munajpi David pacajushpa rijpica, Jonatanga Davidta ricungapaj rishpami cashna nirca: Ama manllaichu candami Jehová Diosca israelitacunapa jatun mandaj cachunga agllashca. “Chaitaca, ñuca taita Saulpash alimi yachan” nishpa. ¿Jonatán shina shuj ali amigota charingapaj munanguimanllu?

Jonatanga paipa amigo Davidta ayudanamandaca tauca viajemi paipa causaita peligropi churarca. Jonatanga paipa taita Saúl, Davidta huañuchingapaj munashcata yachashpaca Saultaca cashnami nirca: ‘Canda sirvij Davidta llaquichishpa ama juchata ruranguichu. Paica, ima nalitapash candaca na rurashcachu’ nishpa. Shina nijpica Saulca, Jonatanhuan ninandami culirarca. Huaquin huatacuna jipaca Saulpash, Jonatanbash shuj macanajuipimi ishcandi huañurca.

Jonatán huañushca jipaca Davidca Mefibóset shuti runagutami mascarca. Paica Jonatanba churimi carca. Mefibóset runaguta tarishpaca cashnami nirca: ‘Canba taita Jonatanda juyashcamandami, candaca llaquishpa ayudasha. Canbash ñuca mesapimi tucui causaipi micushpa causangui’. Ñuca causaj huasipillatami causangui nishpa. Shinami Davidca paipa amigo Jonatandaca nunca na cungarca.