Лэ Саулоско барэдэр шаво о Ионафано сас смило воино. О Давидо ԥэндя, кай во сас май быстро, чем о орло и май зорало, чем о лево. Еқвар о Ионафано додиқля по плай 20 манушэн анда Филистия. Во ԥэндя кодэлэсти, ко ԥиравэлас лэстири оружия: «Амэ ласа тэ мараспэ, кала о Иегова сыкавэла када. Сар? Кала и филистимляноря ԥэнэна тэ ваздаспэ лэндэ». И филистимляноря зацыписайлэ: «Ваздэнпэ, кай тэ мараспэ!» Тоди о Ионафано и ко ԥиравэлас лэстири оружия, вазглэпэ по плай и умардэ лэн.

О Ионафано сас лэ Саулоско барэдэр шаво и о царство лэсти трэбуй сас тэ авэл. Но о Иегова витидя, кай дуйто царё андо Израилё тэ авэл о Давидо. О Ионафано када ӷанэнас и на холявэлас пэр лэстэ. Вонэ слинэ, сар чаче ԥрала. Вонэ динэ алав тэ фэрин ек аврэс.  О Ионафано отдя лэсти пэстири йда, мечо, луко и кущик, кай тэ сыкавэл, кай вонэ друӷоря.

Кала о Давидо гарадёлас лэ Саулостар, лэстэ авеля о Ионафано и ԥэндя: «На дар и ав зорало. О Иегова тут витидя царёса. И даже мэрно дад када ӷанэн». Камэс, кай тутэ тэ авэл кацаво лашо друӷо, сар о Ионафано?

О Ионафано най еқвар моӷ тэ хасарэл и жизня важ пэско друӷо. Во ӷанэнас, кай лэско дад загиндосардя тэ умарэл лэ Давидос. Важ када ԥэндя лэ дадэсти: «Када бэзэх тэ умарэс лэ Давидос. Во нисо вэрыто на стердя!» О Сауло фартэ холяйля пэр лэстэ. Прожыля время о Сауло и о Ионафано мулинэ андэ война.

Сар муля о Ионафано, о Давидо виарақля лэстирэ шавэс Мемфивосфеёс и ԥэндя: «Тиро дад сас манди, сар ԥрал. Важ када мэ диқава пала тутэ вся тири жизня. Ту жувэса андэ мэрно цэр и хаса манца пала ек столо». О Давидо никала на бистрэлас пала пэско друӷо о Ионафано.