Moote Saaoolira Yoonaataani yinannihu bayiru beetti noosi; isi worba olamaanchooti. Daawiti, Yoonaataani allamurchunni roore rahannohanna doobbiichunni roore jawaata ikkinota coyiˈrino. Mitto barra Yoonaataani ilaalu aana 20 Filisxeemete olamaasine noota lai. Isi olu uduunne duhinosi beettira togo yii: ‘Insawa marreemmohu Yihowa malaate kulinkero callaati. Filisxeeme ninkewa amme yitunkero marreemmo.’ Hakkiinni Filisxeeme ‘Olammeemmona ninkewa amme!’ yitunsa. Konni daafira, lamunku ilaalu aanira fulte lemoonta olanto shitu.

Yoonaataani Saaoolira bayira beetto ikkino daafira, Saaoolinni aanche moohannohu isooti. Yoonaataani kayinni Yihowa Saaoolinni aanche moohanno gede Daawiti doorinota afino; ikkollana isi Daawiti dihinaasino. Yoonaataaninna Daawiti lubbote jaalla ikkitu. Insa mimmito  agarreemmo yite qaale eˈino. Yoonaataani Daawitira jaala ikkinota leellishate uddanosi, bisesi, digaanasinna qawattosi uyinosi.

Daawiti Saaooliwiinni xooqanni heeˈreenna Yoonaataani Daawitiwa mare, ‘Jawaati, waajjitooti. Yihowa ate moote asse doorinohe. Anniˈya nafa tenne afino.’ Ati Yoonaataani gedeehu danchu jaali heeˈrahera hasiˈratto?

Yoonaataani lubbosi nafa mararikki jaalasi Daawiti duucha hige kaaˈlino. Isi Moote Saaooli Daawiti shaara hasiˈrinota afiti, annisira togo yiino: ‘Daawiti shite cubbantooti. Isi huninori dino.’ Hakkiinni Saaooli Yoonaataanira lowo geeshsha hanqi. Shiimu diri gedensaanni Saaoolinna Yoonaataani olu bayicho reyitino.

Daawiti Yoonaataani reyi gedensaanni, Memfiboste yinanniha Yoonaataani beetto hasi. Daawiti Memfiboste isiwa dayita togo yiisi: ‘Annikki lubbote jaalaˈya ikkino daafira, lubbote nootto geeshsha towateemmohe. Ati ledoˈya heeˈratto, hattono sagale ledoˈya itatto.’ Daawiti jaalasi Yoonaataani horo dihawino.