Yonatane mwana a kumpala a Nfumu Saule baadi kilobo kya ngoshi. Daavide baambile shi e lubilo nka bu kiminyi na bukome nka bu ntambwe. Dingi efuku Yonatane bamwene basalayi 20 ba beena Filistine ku mwengye. Aye nkulungula musalayi aaye shi: ‘Atulu nabo nka su Yehowa betupa kitundwilo. Su beena Filistine abetulungula bwa kukamina kwabadi, paapa atumono bya kulwa nabo.’ Beena Filistine nkwibeela musaase shi: ‘Kaminaayi bwatudya kulwa ngoshi!’ Abo nkukamina bubidi bwabo nkwibatshokola.

Bu bibaadi Yonatane bu mwana a kumpala a Saule, baadi na kya kwikala muntu a kabidi mu mulongo wa ba nfumu. Kadi Yonatane baadi auku shi Yehowa baadi musangule Daavide bwa kwikala nfumu a kabidi mu Isaleele, Yonatane tabaadi mumukwatshile kyutu nya. Aye na Daavide abafikile ba kuuku. Abaadi belayisheene bwa kulama na kwikalwila umune na mukwabo. Yonatane bapeele Daavide kikotshi  kyaye, lupete lwaye na kumwinamina bu kitundwilo kya bu kuuku bwabo.

Pabaadi Daavide asuuku nfumu Saule, Yonatane bayile kwadi amulungula shi: ‘Kankamana onyingye’eshimba. Yehowa mmukusangule bwa kwikala bu nfumu. Sunga nshami auku byabya.’ Okumiina kwikala na kuuku e buwa bu Yonatane su?

Misusa ibungi, Yonatane batudile muuwa waaye mu masaku bwa kukwasha kuuku aye. Baadi muukye shi Saule akimbi kwipaa Daavide. Nyi aye nkulungula nshaye shi: ‘Abiikala mulwiisho ukata su boyipaa Daavide; ta mukite kintu kii bubi nya.’ Saule nkufiitshila Yonatane munda. Kunyima kwa bipwa, Saule na Yonatane abafwile ku ngoshi.

Kunyima kwa lufu lwa Yonatane, Daavide bakimbile Mefiboshete mwana a Yonatane. Pabaadi Daavide mumupete, bamulungwile shi: ‘Pa mwanda wa bibaadi nshobe bu kuuku’ande a p’eshimba, abintungu n’etatshishe b’oobe mu mafuku ooso wekala na muwa. Wekala pamune nami na kudya naami pa mesa ande.’ Daavide tabaadi mulube kuuku’aye Yonatane nya.