Yonatan, anạ i Datu Saul kaiakanenge, kai sěngkatau prajuritẹ̌ bahani. Daud naul᷊ị i Yonatan limembong masahawụ bọu kasiahe kụ limembong matoghasẹ̌ bọu singa. Piạ su sahěllo, Yonatan nakasilo manga prajuritu Filistin su wukidẹ̌. I sie nẹ̌bera su tau nẹ̌bawa sěnjatane, ’Mạeng Yehuwa měgělị tatiala, i kitẹ mělawang si sire.’ Mạeng tau Filistin měngoro si kitẹ awị, ene tempone mělawang si sire.’ Bọu ene prajuritu Filistin nẹ̌kui, ’Awịe ramahi kụ lawangke i kami! I rẹ̌dua naawị kụ nakakala 20 prajuritu Filistin.

Ualingu Yonatan anạ kaiakaneng i Saul, sěběnarẹ̌e i sie makoạ datu tuhụe. Katewe, Yonatan masingkạ Yehuwa seng němile si Daud makoạ datu tuhụe. Maning kerene, Yonatan tawe iri. Yonatan dingangi Daud nakoạ hapị mapia. I rẹ̌dua nẹ̌diandi gunang měndiagạ dingangu mẹ̌tul᷊ung sěmbaụ su wal᷊inẹ. Yonatan něgělị rompi  manandụ, peda, busur panah, dingangu papehẹ si Daud gunang makoạ tatialang pẹ̌dal᷊ahapị i rẹ̌dua.

Su tempong i Daud timal᷊ang bọu i Saul, Yonatan nakoạ sarang i Daud kụ nẹ̌bera, ’I kau harusẹ̌ pakatoghasẹ̌ dingangu pakawahani. Yehuwa seng němile si kau makoạ datu. I papạku masingkạ ene.’ Apa i kau mapulu piạ hapị mapia kere i Yonatan?

Yonatan bal᷊inẹ kětạeng sěnsul᷊ẹ nẹ̌tul᷊ung hapịe maning ene mawahaya. I sie masingkạ Datu Saul mapulu měmate si Daud. Hakị u ene, i sie naul᷊ị si Saul, ’Daud tawe nẹ̌sal᷊a. Mạeng i papạ měmate si sie, i papạ někoạ dosa.’ I Saul sěbạe nẹ̌pědu si Yonatan.

Pira taung bọu ene, i Saul dingangi Yonatan nate su tempong nẹ̌pěrang. Bọu ene, i Daud nẹ̌deạ si Mefibosyet, anạ i Yonatan. Su tempong nẹ̌sombang dingange, Daud naul᷊ị, ’Iạ měndiagạ si kau su kanandụu wiahu, ual᷊ingu i papạu kai hapị mapia dingangku. I kau sarung mẹ̌tanạ su istanaku kụ kumaěng sěngkasio dingangku.’ Daud tawe niwul᷊e su hapịe, i Yonatan.