Maramila bey herim-po ty Jonatana, voalohan’ana i Saoly. Mahalay ambone o voromaherio sady matanjake mihoatse o lionao reke hoe ty Davida. Nahatrea maramila Filistina 20 tambone haboagneo reke tie indraike. Hoe reke tamy i mpinday fialia’ey: ‘Naho mitoka iareo le tafihentika, fa izay ty famantaragne mey i Jehovah.’ Hoe i Filistina rey tie: ‘Avia fa hialy tika.’ Nimbeo iareo, le nahafate Filistina 20.

Voalohan’ana i Saoly reke, le ie ty ho nimpanjaka handimbe aze. Faie fanta i Jonatana tie i Davida ty finily i Jehovah handimbe an-drae’e, le tsy nialogna’e. Nanjare mpinamagne bey ty Jonatana naho i Davida. Nirehafa’e ty Davida fa ho tohagna’e naho harova’e.  Natoro i Jonatana tie ragne’e ty Davida, le nimea’e akanjo, mesabey, folesidoro naho sentira.

Naho fa nilay i Saoly ty Davida, le nampahery aze ty Jonatana tie: ‘Mahereza fa ko matahotse, fa ihe ty finily i Jehovah ho mpanjaka. I babako ka mahay izay.’ Te ho namagne soa manahake i Jonatana ka vao rehe?

Nagnavotse i Davida mateteke ty Jonatana ndra tie fa ho nimate. Fanta’e fa te hamono i Davida ty Saoly faie hoe reke tama’e: ‘Manota rehe naho mamono i Davida, satria reke tsy manao raty.’ Niboseke tamy i Jonatana ty Saoly tamy izay. Nimate tagn’aly agne iareo miroanake tafara tatoy.

Naho fa nimate ty Jonatana, le nipay i Mefiboseta ana’e ty Davida. Hoe reke naho fa nahatrea aze: ‘Ragneko ty baba’o, le izaho ty hikarakara azo amparake ty iaigna’o. Hipetrake an-dapako ao rehe sady hiharo fihinagne amako’. Tsy nagnaligno i Jonatana nama’e ty Davida.