Mwana waMwaami Sawulu, mupati, Jonatani wakali silumamba uutayoowi. Davida wakati Jonatani wakali kuchijaana kwiinda gumbe alimwi kasimide kwiinda mulavu. Limwi zuba, Jonatani wakabona basilumamba bamaFilisti ajulu achilundu. Wakabuzya sikumubwezela masumu kuti: ‘Tuyoobalwana luzutu kuti Jehova watupa chitondeezyo. Ikuti maFilisti bakatwiite, tweelede kubalwana.’ MaFilisti akoompolola kati: ‘Amuze muzootulwane!’ Kabali babili, bakatanta achilundu mpawo bakazunda basilumamba bamaFilisti bali 20.

Jonatani wakeelede kuba mwaami nkaambo wakali mwana waSawulu mupati. Pesi taakamuchitila munyono pe Davida, nkaambo wakalizi kuti Davida wakasalidwe aJehova kuti azoobe mwaami. Jonatani aDavida bakaba beenzinyina. Bakasyomezyania kuti banoovunana.  Davida wakapegwa zipo aJonatani ziswaanizya jansi, panga, kanta abbanti zyakali kutondeezya kumvwanana kwabo.

Chiindi Davida naakali kuchija Sawulu, Jonatani wakiinka kulinguwe akumubuzya kuti: ‘Basichamba utayoowi pe. Jehova wasala nduwe kuti ube mwaami. Alakwe ndeende ulizizi.’ Tuyandi na kuba amweenzinyoko ulikabotu uli mbuli Jonatani?

Ziindi zyiingi, Jonatani wakalinjizya mumapenzi kuchitila kuti agwasye mweenzinyina. Wakalizi kuti Mwaami Sawulu wakali kuyanda kujaya Davida, nkinkaako wakabuzya wisi kuti: ‘Munooli mwabisya kuti mwamujaya Davida, nkaambo taakwe chibi nchaakachita.’ Sawulu wakamunyemena loko Jonatani. Nikwakiinda minyaka, Sawulu aJonatani bakafwa boonse kunkondo.

Jonatani naakafwa, Davida wakayanduula mwana waJonatani, Mefibbosheti. Davida naakabona Mefibbosheti wakamubuzya kuti: ‘Ndiyanda kukutondeezya luyando mazuba oonse nkaambo wuso wakali mweenzuma. Uzookkala mung’anda yangu akulya nsima lyoonse kulindime.’ Davida taakamuluba pe mweenzinyina Jonatani.