Ja bʼajtan yunin ja Saúl sbʼiʼil Jonatán, sok waj jun kʼakʼanum mi xiwi. Ja David yala ja Jonatán mas ligero yuj jun águila sok mas tsats yuj jun choj. Jun kʼakʼu, ja Jonatán yila 20 kʼakʼanum filisteoʼik bʼa jun bʼujan wits. Ti yala yabʼ ja skuchuman syamkʼabʼi: «Oj tiroʼanukotisoke kechan ta ja Jyoba xyaʼakitik jun senya. Ta ja filisteoʼik xyalawe oj kʼekotik, jach oj jnatik ojni tiroʼanukotik». Ja filisteoʼiki awaniye: «¡Laʼik bʼa oj tiroʼanukotik!». Anto ja chabʼ winike kʼeye ja bʼa bʼujan witsi sok smilawe ja kʼakʼanumiki.

Yuja Jonatán yeʼn ja bʼajtan yunin ja Saúl, tʼilani yeʼn oj ochkan mandaranum yajni xcham ja stati. Pe ja Jonatán wa snaʼa ja Jyoba ja stsaʼunej ja David bʼa oj ochkan mandaranum ja bʼa Israel, sok mini yilkʼujolan. Ja Jonatán soka David kʼot yamigoʼuk sbʼaje. Skʼapawe oj  stalnay sbʼaje sok oj skoltay sbʼaje. Bʼa sjejel meran yamigo sbʼaje, ja Jonatán yayi ja David ja spalkʼu, ja yespada, ja yarko soka sincho.

Yajni ja David spakunej ajnel yuja Saúl, ja Jonatán waj yile sok yala yabʼ: «Tʼilan oj ajyan tsats sok mok xiwan. Ja Jyoba stsaʼuneja bʼa oj kʼotan mandaranum. Cha wani snaʼa ja jtati». ¿Wan maʼ xa kʼana oj ajyuk juna lekil wamigo jastal ja Jonatán?

Ajyi ekʼele ja Jonatán skoltay ja yamigo ama xiwela sbʼaj ay jas oj ekʼ sbʼaj. Ja yeʼn wa snaʼa ja stati wa skʼana oj smil ja David, ja yuj yalyabʼ: «Ta amila ja David, oja taʼa mul. Ja yeʼn mi jas skʼulunej». Ja Saúl jel tajki soka Jonatán. Jujuntik jabʼil tsaʼan, ja Saúl soka Jonatán chamye bʼa jun tiroʼanel.

Tsaʼan yajni cham ja Jonatán, ja David sleʼa ja yunin ja Jonatán, ja Mefibóset. Yajni staʼa, yala yabʼ: «Ojni jtalnaya ja bʼa wa sakʼanil yujni jawa tati waj jun lekil kamigo. Ti oj ajyan bʼa jnaj sok ti oj waʼan bʼa jmesa». Ja David mini tʼun chʼay skʼujol ja yamigo Jonatán.