Ɔhene Saul ba panyin ne Yonatan. Ná onim sɛnea wodi ako, na na ɔwɔ akokoduru paa. Dawid kaa sɛ, Yonatan ho yɛ hare sen ɔkɔre, na ne ho yɛ den sen gyata. Da bi, Yonatan huu Filistifo asogyafo 20 wɔ bepɔw bi so. Ɔka kyerɛɛ ne somfo a okura n’akode no sɛ: ‘Sɛ Yehowa ma yɛn sɛnkyerɛnne bi nko ara a, yɛne wɔn bɛko. Sɛ Filistifo no ka sɛ yɛmmra a, ɛbɛma yɛahu sɛ ɛsɛ sɛ yɛkɔ wɔn so.’ Filistifo no teɛɛm sɛ: ‘Mommra ma yɛnko!’ Enti mmarima mmienu no foroo bepɔw no, na wokodii asogyafo no so nkonim.

Esiane sɛ na Saul ba panyin ne Yonatan nti, sɛ Saul wu a, na Yonatan na obedi n’ade. Nanso na Yonatan nim sɛ Yehowa apaw Dawid sɛ Israel hene a odi hɔ. Ne nyinaa akyi, Yonatan ani ammere Dawid. Yonatan ne Dawid faa adamfo denneennen. Wɔn mmienu nyinaa hyɛɛ wɔn ho bɔ sɛ obiara bɛbɔ ne yɔnko ho ban  na wɔaboa wɔn ho wɔn ho. Yonatan de n’atade nguguso, ne nkrante, n’agyan, ne n’abɔso anaa ne bɛlt maa Dawid de kyerɛɛ sɛ ampa wɔyɛ nnamfo.

Bere a Saul nti Dawid reguan no, Yonatan kɔɔ Dawid nkyɛn kɔka kyerɛɛ no sɛ: ‘Ma wo bo nyɛ duru na nya akokoduru. Yehowa ayi wo sɛ wobɛyɛ Israel so hene. Me papa koraa nim saa.’ Wowɔ adamfo pa te sɛ Yonatan a, anka wompɛ?

Yonatan de ne nkwa too ne nsam boaa n’adamfo Dawid mpɛn pii. Ná onim sɛ Ɔhene Saul pɛ sɛ okum Dawid, enti ɔka kyerɛɛ ne papa Saul sɛ: ‘Wukum Dawid a, woayɛ bɔne. Ɔnyɛɛ bɔne biara.’ Saul bo fuw Yonatan paa. Mfe bi akyi no, Saul ne Yonatan kɔɔ ɔko, na wowui.

Yonatan wui akyi no, Dawid hwehwɛɛ Yonatan ba Mefiboset. Bere a Dawid huu Mefiboset no, ɔka kyerɛɛ no sɛ: ‘Ná wo papa yɛ m’adamfo paa, enti wo nkwa nna nyinaa mɛhwɛ wo. Wobɛtena m’ahemfie na wubedidi me pon so.’ Dawid werɛ amfi n’adamfo Yonatan da.