Te sba snichʼan te ajwalil Saúl, Jonatán sbiil sok ya snaʼ yakʼel guerra te maba ya xiw. Te David la yal te kʼaxemtoxan ya x-animaj-a te bitʼil xik sok jaʼ bayalxan yip te bitʼil te leon choje. Ta jun buelta, te Jonatán la yil chaʼoxtul filisteoetik te ayik ta wits. Jich la yalbey te jkuch-aʼtejibal yuʼune: “Yame kochintaytik, jaʼnax teme ya yakʼbotik señail te Jehová. Teme ya yalbotik te filisteoetik te ya xmootik baele, jich ya jnaʼtik-a te ya skʼan ya kochintaytike”. Te filisteoetik jich la yalik ta aw: “¡Moanik tal ta yakʼel guerra!”. Jich yuʼun te Jonatán sok te jkuch-aʼtejibal yuʼune moik bael ta wits sok la smilik 20 ta tul soldadoetik.

Jich bitʼil jaʼ ba nichʼanil te Jonatane, jaʼ ya x-och ta ajwalil te kʼalal ya xlaj te state. Pero te Jonatán snaʼoj te jaʼ tsabilix yuʼun Jehová te David swenta ya x-och ta ajwalil yuʼun Israel, jich yuʼun maba la sbikʼtal oʼtantay. Te Jonatán sok te David la yamigoin sbaik ta lek. La yalbey  sbaik ta jamal te talel kʼaxel ya skanantay sbaik sok te ya skoltay sbaike. Swenta ya yakʼik ta ilel te yamigo sbaike, te Jonatán la yakʼbey David te snajtʼil kʼuʼ, te yespada, te stʼimalteʼ sok te schujkil schʼujtʼe.

Kʼalal te David yak ta anel ta stojol te Saule, te Jonatán bajtʼ yil sok jich la yalbey: “Yame skʼan ayuk awip sok te maba ya xiwate. Te Jehová stsaojat yuʼun ya x-ochat ta ajwalil. Jaʼnix jich te jtat snaʼoj ta lek”. ¿Yabal amulan te ayuk jtuluk awamigo te lek yoʼtan jich bitʼil te Jonatane?

Te Jonatán bayal buelta kʼan lajuk ta skaj te ya skoltay te yamigoe. Te Jonatán snaʼoj bitʼil te ajwalil Saúl te state, ya skʼan ya smil te Davide, jich yuʼun la yalbey: “Teme ya amil te David, yame ata amul. Maʼyuk bin chopol spasoj stukel”. Te Saúl bayal ilin ta stojol te Jonatán. Cheʼoxeb jaʼbil ta patil, te Saúl sok te Jonatán lajik ta guerra.

Te kʼalal lajemix-a te Jonatán, te David la sle te Mefi-boset te jaʼ snichʼan te Jonatane. Te kʼalal la stae la yalbey: “Yame jkanantayat te jayeb kʼajkʼal kuxulat, melel te atat jaʼ lekil kamigo-a. Yame xnainat ta jmukʼul na sok ya xweʼat ta jmesa”. Te David maʼyuk bin-ora chʼay ta yoʼtan te yamigo Jonatán.