Omõla uveli wa soma Saulu Yonatão, wa kala esualali limue ukuotõi. Daviti wa popele okuti Yonatão kolupesi wa velapo, ongonga yi sule kuenda kongusu wa velapo, ohosi yi sule. Eteke limue Yonatão wa mola 20 kasualali a va Filisiti kilu liomunda yimue. Eye wa sapuila ukuenje ukuakuambata ovimãlẽho viaye hati: ‘Tu yaka lika lavo nda Yehova wa eca kokuetu ondimbukiso yimue. Nda va Filisiti va popia letu vati, lamaneli kokuetu, tu kũlĩha okuti epuluvi lioku va katukila.’ Noke va Filisiti va kaluka lolukandi vati: ‘Lamaneli kokuetu kuenda yaki!’ Kuenje Yonatão kumue lukuenje waye va londa kilu liomunda kuenda va yula asualali vaco.

Omo okuti Yonatão wa kala omõla uveli wa Saulu, eye wa kuatele omoko yoku pinãla usoma. Yonatão wa kũlĩhĩle okuti Yehova wa nõla Daviti oco a linge osoma yokaliye ya va Isareli, pole, eye ka kuatele onya. Yonatão la Daviti veya oku kala akamba vocili. Ovo va linga ohuminyo yoku teyuila kuenda oku popela omunu lukuavo. Yonatão wa  eca ku Daviti ocikutu caye, osipata, ohonji kuenda uvia waye ndocindekaise cukamba uwa.

Eci Daviti a kala oku tila Saulu, Yonatão wa enda kokuaye kuenje wo sapuila hati: ‘Kolisako kuenda ku ka kuate usumba. Yehova wa ku nõla oco o linge osoma. Isiange layevo wa ci kũlĩha.’ Ove hẽ o yongola oku kuata ekamba limue liwa ndeci Yonatão?

Olonjanja vialua Yonatão wa kapa kohele omuenyo waye oco a kuatise ekamba liaye. Eye wa kũlĩhĩle okuti Soma Saulu wa yonguile oku ponda Daviti. Omo liaco, wa sapuila isiaye hati: ‘Eci nda ca linga ekandu kokuove oku ponda Daviti; momo eye ka lingile cimue cĩvi.’ Saulu wa temẽle la Yonatão. Noke yoku pita anyamo amue, Saulu kuenda Yonatão va fila kumosi vuyaki.

Noke yolofa via Yonatão, Daviti wa enda oku ka sandiliya Mefivosiete omõla a Yonatão. Eci o sanga wa sapuila Mefivosiete hati: ‘Omo okuti isiove wa kala ekamba liwa kokuange, ame ndu ku tata vokuenda kuomuenyo wove wosi. O ka kala velombe liange kuenda o ka lialia komesa yange.’ Daviti lalimue eteke a ivaleleko ekamba liaye Yonatão.