Ṅwana muhulwane wa Saulo, Yonathani, o vha e mudziammbi wa tshivhindi. Davida o amba uri Yonathani o vha a na luvhilo lu fhiraho lwa goni na maanḓa a fhiraho a ndau. Ḽiṅwe ḓuvha Yonathani a vhona maswole a 20 a Vhafilisita e thavhani. A vhudza muhwali wa zwiṱhavhane zwawe a ri: ‘Ri ḓo lwa navho fhedzi arali Yehova a ri fha tshiga. Ri ḓo kona u ḓivha nḓila ine ra ḓo lwa ngayo arali Vhafilisita vha ri vhidza uri ri ḓe khavho. Vhafilisita vha vhidzelela vha ri: ‘Gonyani ngeno ri lwe!’ Vhenevho vhanna vhavhili vha gonya thavhani nahone vha kunda maswole.

Nga ṅwambo wa u ri Yonathani o vha e ṅwana wa mutukana muhulwane wa Saulo, o vha a tshi ḓo vha ene khosi i tevhelaho. Fhedzi Yonathani o zwi ḓivha uri Yehova o khetha Davida u vha khosi i tevhelaho ya Isiraele; nahone ho ngo vha na vivho. Yonathani na Davida vho vha vhe khonani dza tsini. Vho fulufhedzisa uri vha ḓo tsireledzana na u tikedzana.  Yonathani a fha Davida tshiambaro tshawe, banga, vhura, na bannda u itela khwaṱhisedza vhukonani havho.

Musi Davida a tshi khou shavha Saulo, Yonathani o ya khae nahone a ri: ‘Imani no khwaṱha nahone ni vhe na tshivhindi. Yehova o khetha inwi uri ni vhe khosi. Na khotsi anga vha a zwi ḓivha zwenezwi.’ Naa ni nga takalela u vha na khonani i fanaho na Yonathani?

Lu fhiraho luthihi, Yonathani o vhea vhutshilo hawe khomboni u itela u thusa khonani yawe. O vha a tshi zwi ḓivha uri Khosi Saulo o vha a tshi ṱoḓa u vhulaha Davida, nga zwenezwo a vhudza khotsi awe a ri: ‘Vha ḓo vha vho ita tshivhi arali vha vhulaha Davida; ho ngo tshinya tshithu.’ Saulo a sinyutshela vhukuma Yonathani. Nga murahu ha miṅwaha, Saulo na Yonathani vha fa vhoṱhe vhe nndwani.

Musi Yonathani o no fa, Davida a ṱoḓa ṅwana wa Yonathani ane a pfi Mefibosete. Musi Davida a tshi mu wana, a vhudza Mefibosete a ri: ‘Ngauri khotsi aṋu vho vha vhe khonani yanga yavhuḓi, ndi ḓo ni ṱhogomela vhutshilo haṋu hoṱhe. Ni ḓo dzula muḓini wanga nahone na ḽa ṱafulani yanga.’ Davida ho ngo vhuya a hangwa khonani yawe Yonathani.