An suhag ni Hadi Saul nga hi Jonatan maisugon nga girriro. Hi David nagsiring nga hi Jonatan mas malaksi ha agila ngan mas makusog ha leon. Usa ka adlaw, nakakita hi Jonatan ha bungtod hin 20 nga Pilisteohanon nga sundalo. Nagsiring hiya ha iya paradara hin armas: ‘Makikig-away la kita kon tagan kita ni Jehova hin sinyales. Kon pasagkahon kita han mga Pilisteohanon, karuyag sidngon makikig-away kita.’ An mga Pilisteohanon nagsinggit: ‘Sagka kamo ngan pakig-away!’ Salit sinagka hira ha bungtod ngan ginpirde an mga Pilisteohanon.

Hi Jonatan an suhag ni Saul salit hiya unta an sunod nga magigin hadi han Israel. Kondi maaram hiya nga hi David an ginpili ni Jehova; bisan pa hito, waray hiya maawa. Hi Jonatan ngan hi David nagin duok nga magsangkay. Nagsaad hira nga didepensahan ngan susuportaran nira an  kada tagsa. Iginhatag ni Jonatan kan David an iya pantungbaw nga bado, espada, pana, ngan paha sugad nga tigaman han ira pagkamagsangkay.

Han nagtitinago hi David kan Saul, ginkadto hiya ni Jonatan ngan ginsidngan: ‘Magmarig-on ka, ngan ayaw kahadlok. Ikaw an ginpili ni Jehova nga magin hadi. Bisan hi Tatay maaram hito.’ Karuyag mo ba magkaada hin maopay nga sangkay pariho kan Jonatan?

Diri la usa ka beses nga ginbutang ni Jonatan ha peligro an iya kinabuhi para ha iya sangkay. Maaram hiya nga gin-iikaparatay ni Hadi Saul hi David, salit ginsidngan niya an iya tatay: ‘Makakasala ka kon patayon mo hi David; waray hiya ginbubuhat nga maraot.’ Nasina gud hi Saul kan Jonatan. Paglabay hin pipira ka tuig, namatay hira Saul ngan Jonatan ha girra.

Kamatay ni Jonatan, ginbiling ni David an anak ni Jonatan nga hi Mepiboset. Han nabilngan niya hi Mepiboset, nagsiring hiya: ‘Maopay nga sangkay hi imo tatay salit aatamanon ko ikaw ha bug-os mo nga kinabuhi. Maukoy ka ha akon palasyo ngan makaon ha akon lamesa.’ Waray gud kalimti ni David an iya sangkay nga hi Jonatan.