Yonatani jwaliji mwanace jwamkulungwa jwa mwenye Sauli, soni msilikali jwakulimba mtima. Daudi ŵasasile kuti Yonatani jwaliji jwacitema kupunda cimbanga, soni jwamacili kupunda lisimba. Lisiku line Yonatani ŵaweni asilikali ŵa Afilisiti ŵakwana 20 ali petumbi. Jwalakwe ŵamsalile jwakumnyakulila yida kuti, ‘Tucawulaga jemanjajo naga Yehofa atupe cimanyilo. Afilisitiwo pacacitusalila kuti tujawule kweleko, tucimanyilila kuti jili ndaŵi jakwawulaga.’ Kaneko Afilisiti ŵala ŵagumisile kuti, ‘Ayice akuno tuputane!’ Pelepo Yonatani yalumo ni jwakumnyakulila yida jula ŵakwesile litumbilyo ni kuja kukwagomeka asilikaliwo.

Yonatani ni jwakajinjile ucimwene m’malo mwa babagwe, ligongo jwaliji mwanace jwamkulungwa jwa Sauli. Nambo jwalakwe ŵayimanyi kuti Yehofa ŵamsagwile Daudi kuŵa mwenye jwakuyicisya jwa Ayisalayeli. M’yoyo Yonatani nganamtendela jelasi Daudi. Yonatani ni Daudi ŵaliji paunasi  wakulimba. Jemanjaji ŵatesile cilanga cakuti cacicenjelanaga. Yonatani ŵapelece kwa Daudi, mkanjo, upanga, ukunje, soni lamba mpela cimanyilo ca unasi wawo.

Daudi paŵamtilaga Sauli, Yonatani ŵapite kwa Daudi ni kumsalila kuti, ‘Mkatenda woga soni mlimbe mtima. Yehofa amsagwile mmwejo kuŵa mwenye. Atamose baba ŵangu akumanyilila cenene yeleyo.’ Ana mkusaka kola mjenu jwambone mpela Yonatani?

Ndaŵi syejinji, Yonatani ŵaŵikaga umi wakwe pangosi pakusaka kumkamucisya mjakwe. Jwalakwe ŵamanyililaga kuti mwenye Sauli akusaka kum’wulaga Daudi, ni jwatite kwa babagwewo, ‘Cikuŵe kulemwa kwa wawojo kum’wulaga Daudi ligongo pangali cakulemwa cilicose catesile.’ Sauli ŵamtumbilile mnope Yonatani. Pali papite yaka, Sauli ni Yonatani ŵawile yalumo kungondo.

Yonatani ali awile, Daudi ŵamsosile Mefiboseti juŵaliji mwanace jwamlume jwa Yonatani. Ali ampatile, Daudi ŵamsalile kuti, ‘Ligongo lyakuti baba ŵenu ŵaliji mjangu jwambone, cinamsamalileje kwa umi wenu wosope. Cimtameje kunyumba jangu ja ucimwene soni cimlyeje patebulo jangu.’ Daudi nganamliŵalila Yonatani.