Xiin lagol Saúl góc laa Jonatán, né gócbu toib soldad ni gop balory. David goniʼ que Jonatán más naguelbu que toib bisié né más nadipbu que toib betz. Toibtica dzú Jonatán bibiʼbu tipnés soldad filisteos guic toib dainy. Ór cú gochbu toib soldad ni roʼoy xquipbu: «Sacalóno layibu nosi pal Jehová guiniʼ gonyno láani. Pal filisteos raniʼ tzoʼno ronoʼyibu, ór cú saduidyno cuent que Jehová ná guicalóno layibu». Filisteos bicaʼ rudx: «¡Colta né tíilno!». Ór cú chop biinreʼ biaʼpy né bunyibu gan guirá soldadcu.

Jonatán góc xiin lagol Saúl, por ngú láabu non ñony mandarybu órni ñaity bixiosbu. Per Jonatán gondxich que Jehová ma golúbu David par gony mandary xalagary Saúl né diti bianladxbu David. Xalagary ngú, Jonatán né David góc  ximigdxinyibu saʼyibu. Né biduidyibu xtiitzyibu que ñanyibu saʼyibu. Jonatán bislooy que David nac ximigdxinbu órni biscadbu xtónbu, espad, mbaas né cinturón xtunybu David.

Órni David bixonybu par diti nagaity Saúl láabu, Jonatán goyguen né góoch láabu: «Góc nadip né gop balory. Jehová ma golú looy par gony mandarylo. Né dada bixiosa nantzay láani». ¿Raniiny looy ñoʼ toib ximigdxinlo xomod Jonatán la?

Jonatán goyoʼ ló riesga xidal buelt par gocnébu ximigbu David. Láabu gonbu que rey Saúl goniiny nagaitybu David, por ngú gochbu bixiosbu: «Toib galkié rodann sonylo pal guigaitylo David. Diti ma goyoʼ ni bunybu looy». Saúl bidzuitzgoluʼ né Jonatán. Godudy íz, Saúl né Jonatán goityibu ló guerr.

Después ni goity Jonatán, David biyopybu Mefibóset, ni góc xiin Jonatán. Órni bidzel David láabu, gochbu Mefibóset: «Nigolú ximigdxina góc bixioslo por ngú saana looy dada gaitylo. Cuéslo lainy palacio né ni cayóya ngúca soolo». David dipa bialadxbu ximigbu Jonatán.