Saúl reyejj jiwjjäna ukhajja, Davidaw reyëjjäna. Jupajj 30 maranïnwa. Walja maranak pasatatjja, mä arumajj palacio patjjatwa Davidajj mä suma warmiru jarisiskir uñjäna. Uka warmejj Bat-Seba satänwa, Urías sat soldadon esposaparakïnwa. Ukanak yatjjatasajja Davidajj palacioruw uka warmir irptayanïna, jupampiw ikintasirakïna. Ukhamatwa Bat-Sebajj usurëjjäna. Davidajj uka juchapjja imtʼañ munäna. Ukatwa ejerciton generalapar akham säna: ‘Uriasarojj nayraqataruw guerran khitapjjäta, sapak jaytjapjjarakïta’ sasa. Ukanwa Uriasajj jiwjjäna, Davidasti Bat-Sebampiw casarasjjarakïna.

Jehová Diosajj kunatï paskäna uk uñjaskänwa. Ukhamajj ¿kunsa luräna? Natán profetaruw Davidampi parlañapatak khitäna. Natanajj Davidar sänwa: ‘Walja ovejanakani mä qamir jaqempi, mä ovejitani mä pobre jaqempiw utjäna. Qamir jaqejja pobre jaqen munat ovejitapwa aparäna’ sasa. Uk istʼasajja Davidajj wal colerasïna, sarakïnwa: ‘¡Uka qamir jaqejj jiwañapawa!’ sasa. Natán profetajj ‘¡jumätaw uka qamir jaqejja!’ sasaw säna. Davidajj wal llakisïna, Natán profetar akham sarakïnwa: ‘Jehová Dios contraw juchachasta’ sasa. Uka juchapatjja, Davidasa familiapasa kunayman jan walinakanwa uñjasipjjäna. Diosajj Davidar castigänwa, ukampis suma chuymani humilde jaqëtap laykojj janiw jiwaykänti.

Davidajj Jehová Diosatakiw mä templo lurañ munäna. Ukampis Jehová Diosajj Davidan Salomón sat yoqaparuw templo lurañapatakejj ajllïna. Ukatwa Davidajj Salomonan utachañapatakejj wakichañ  qalltäna, ukatsti akham sarakïnwa: ‘Jehová Diosan templopajj wali sumäñapawa. Salomonajj wawäskiwa, ukampis nayaw taqe kun wakichtʼañ yanaptʼäjja’ sasa. Templo utachañatakejj walja qollqwa Davidajj jaytäna. Suma trabajirinak thaqarakïna; qori, qollqe wakicharakïna. Tiro, Sidón markanakatwa cedro sat madera apayanirakïna. Davidajj niya jiwañampëjjäna ukhajja, Salomón wawaparuw templo lurañatak planonak churäna, akham sasa: ‘Jehová Diosaw jumar churañajatakejj akanak qellqayitu. Jupaw yanapaskätam. Jan ajjsaramti, chʼamani saytʼasim, templjja sum lurarakim’ sasa.