Ler Sail ti mor, David ti vin lerwa. I ti annan 30 an. Plizyer lannen pli tar, Lerwa David ti fer en fot grav. En zour swar ler i ti anler dan son pale, i ti vwar en zoli madanm. Pli tar i ti aprann ki sa madanm ti apel Bat-Seba e ki i ti’n marye avek en solda ki apel Ourya. David ti fer Bat-Seba vin dan son pale. Zot ti dormi ansanm e Bat-Seba ti tonm ansent. David ti sey kasyet sa ki i ti’n fer. I ti demann sef son larme pour met Ourya lo fron batay dan lager. Apre ki Ourya ti’n ganny touye dan lager, David ti marye avek Bat-Seba.

Me Zeova ti vwar tou bann move keksoz ki ti’n arive. Ki i ti fer? Zeova ti anvoy profet Natan kot David. Natan ti dir: ‘I ti annan en zonm ris ki ti annan en kantite mouton e i ti annan en zonm pov ki ti annan zis en pti mouton ki i ti kontan. Sa zonm ris ti pran sa sel mouton ki sa zonm pov ti annan.’ David ti vreman ankoler e dir: ‘Sa zonm ris i merit lanmor!’ Apre Natan ti dir David: ‘Ou menm sa zonm ris!’ David ti vreman tris e i ti dir Natan: ‘Mon’n fer pese kont Zeova.’ David ek son fanmir ti rankontre en kantite problenm dan zot lavi akoz sa pese. Zeova ti pini David, me i pa ti ganny touye akoz i ti annan limilite e i ti onnet.

David ti anvi konstri en tanp pour Zeova, me Zeova ti swazir son garson Salomon pour konstri sa tanp. David ti konmans  met pare bann keksoz pour Salomon. David ti dir: ‘Tanp Zeova i devret vreman zoli. Salomon i ankor zenn me mon pou ed li met keksoz pare pour konstri sa tanp.’ David ti donn en kantite larzan pour sa proze konstriksyon. I ti rod bann travayer kalifye. I ti anmas lor ek larzan e i ti fer vini pye sed sorti Tir ek Sidon. Ler David ti pros pour mor, i ti donn Salomon plan pour konstri tanp. I ti dir: ‘Zeova in fer mwan ekri sa bann keksoz pour ou. Zeova pou ed ou. Pa bezwen per. Fodre ou for e konmans travay.’