E tui sara o Tevita ni mate o Saula, oya ni sa yabaki 30. Oti e vica na yabaki nona veiliutaki, ni tiko ena nona delanivale ena dua na bogi, e raica sara e dua na marama totoka. E qai kila ni yacana o Pacisepa, na wati Uraia na sotia. E kaya o Tevita me kau yani vua. Rau veiyacovi mani bukete o Pacisepa. E saga o Tevita me vunitaka na ka e cakava, e kaya vua na turaganivalu me biuti Uraia ena iyatu e liu ena gauna ni vala, mera qai suka i muri na kena vo. Ni mate o Uraia, e vakawatitaki Pacisepa sara o Tevita.

E raica vinaka tu o Jiova na ka ca e cakava o Tevita. Na cava ena cakava kina? E talai Necani sara na parofita vei Tevita. E kaya o Necani: ‘Dua na turaga vutuniyau e levu nona sipi, na turaga dravudravua e dua ga nona luvenisipi, e lomana tale ga vakalevu. Ia e kauta na sipi qori na turaga vutuniyau.’ E cudru o Tevita qai kaya: ‘Me mate na turaga vutuniyau qori!’ E kaya o Necani: ‘O kemuni sara ga na turaga vutuniyau!’ E rarawa dina o Tevita, e vakatusa vei Necani: ‘Au sa valavala ca vei Jiova.’ E qai yaco e levu na leqa ena nona vuvale. E totogitaki Tevita o Jiova, ia e vakabulai koya tiko ga ni dau dina, e yalomalumalumu tale ga.

A via tara o Tevita na valenisoro, ia e digi Solomoni o Jiova me cakava qori. E mani vakarautaka vua o Tevita na kena iyaya,  e kaya: ‘Me totoka na vale i Jiova. Se gone o Solomoni, au na vukei koya ena vakarautaki ni iyaya.’ E levu na ilavo e solia, e kauti ira mai na kenadau, kumuna na koula kei na siliva qai veivosakitaka me kau mai na sitari mai Taia kei Saitoni. Ni sa voleka ni mate, e solia vei Solomoni na peleni ni valenisoro. E kaya: ‘E tukuna o Jiova meu vola qo me baleti iko. Kua ni rere. Mo yaloqaqa, mo cakava sara.’