Wo de Saul stirbt, wird de David König. Er isch denn 30 Jahr alt. Es paar Jahr später, amene Abig, isch de David grad uf em Dach vo sim Palascht. Vo dört us gseht er e wunderschöni Frau. Er findet use, dass ihre Name Bathseba isch und si miteme Soldat ghürate isch, wo Uria heisst. De David schickt öpper, wo d Bathseba i sin Palascht holt. Er schlaft mit ihre und si wird schwanger. De David wett das verheimliche: Er seit em Scheff vo sinere Armee, dass er de Uria i de Schlacht ganz vore söll ufstelle. Di andere sölled sich denn hinder ihm zruggzieh. I dere Schlacht wird de Uria tötet und de David hüratet d Bathseba.

Jehova het all das Böse gseh, wo passiert isch. Was macht er echt jetzt? Er schickt de Prophet Nathan zum David. De Nathan seit zu ihm: «En riiche Maa het vil Schaf gha und en arme Maa nur eis einzigs Lämmli, wo er sehr gern gha het. Aber de riich Maa het ihm das einzige Lämmli eifach weggno.» De David wird grad verruckt und seit: «De riich Maa muess für das sterbe!» De Nathan git ihm zur Antwort: «Du bisch de riich Maa.» Da wird de David eso truurig und git zue: «Ich ha gege Jehova gsündiget.» Wege dere Sünd hend de David und sini Familie nachher vil Problem. Jehova bestraft de David. Aber wil er ehrlich und demüetig isch, muess er nid sterbe.

De David möcht gern für Jehova en Tempel baue. Aber Jehova wett, dass de Salomo, de Sohn vom David, de Tempel baut. Drum fangt de David a, für de Salomo alles vorzbereite. Er seit: «De Tempel vo Jehova muess würklich grandios werde. De Salomo isch no eso jung und drum wird ich ihm helfe und alles vorbereite.» De David spendet vil vo sim eigete Geld für das Projekt. Er luegt, dass gueti Handwerker ume sind. Er spart Gold und Silber und laat Zedereholz us Tyrus und Sidon la cho. Bevor er stirbt, git er em Salomo d Bauplän und seit zu ihm: «Ich ha alles für dich eso ufzeichnet, wies Jehova mir gseit het. Muesch kei Angscht ha, Jehova hilft dir. Bis starch und mach dich a d Arbeit.»