Whenue Sauli kú, Davidi lẹzun ahọlu. Owhe 30 wẹ e tindo to whenẹnu. To whenue e ko duahọlu na owhe delẹ godo, e to họta họ̀nmẹ etọn tọn to zánmẹ gbèdopo bo mọ yọnnu he yọnwhanpẹ de hlan. Davidi wá sè dọ Bati-ṣeba wẹ yọnnu lọ nọ yin bọ awhànfuntọ de he nọ yin Ulia wẹ yin asu etọn. Davidi domẹhlan nado plan Bati-ṣeba wá họ̀nmẹ etọn. E sọ tindo kọndopọ zanhẹmẹ tọn hẹ ẹ bọ yọnnu lọ mọhò. Davidi tẹnpọn nado whlá nuhe e wà lọ. E dọna awhàngán etọn dọ ni de Ulia do awhàn nukọn bo lẹkọ sọn godo na ẹn. To whenue Ulia ko yin hùhù to awhàn lọ whenu godo, Davidi plan Bati-ṣeba taidi asi.

Ṣigba, Jehovah mọ nuylankan he ko jọ lọ lẹpo. Etẹwẹ e na wà? Jehovah do yẹwhegán Natani hlan Davidi dè. Natani dọmọ: ‘Dawe adọkunnọ de tindo lẹngbọ susu bọ dawe wamọnọ de tindo lẹngbọvu pẹvi dopo gee he e yiwanna taun. Adọkunnọ lọ sọ hò lẹngbọvu dopo gee he wamọnọ lọ tindo yí sọn e si.’ Homẹgble Davidi bọ e dọmọ: ‘Dawe adọkunnọ enẹ jẹna okú!’ Whenẹnu, Natani dọna Davidi dọmọ: ‘Hiẹ wẹ dawe adọkunnọ lọ!’ Davidi jẹflumẹ bo yigbena Natani dọ: ‘N’ko waylando do Jehovah.’ Ylando ehe hẹn nuhahun susu wá Davidi po whẹndo etọn po ji. Jehovah domẹplọnlọ Davidi go, amọ́ e jo e dogbẹ̀ na ewọ yin nugbonọ bosọ whiwhẹ ede wutu.

Davidi jlo na gbá tẹmpli de na Jehovah, ṣigba Sọlomọni he yin visunnu Davidi tọn wẹ Jehovah de nado gbá tẹmpli lọ. Davidi jẹ awuwlena nuhe sin hudo Sọlomọni na wá tindo lẹ ji bo dọmọ: ‘Tẹmpli Jehovah tọn  dona tindo gigo tlala. Sọlomọni gbẹ́ whè, amọ́ n’na gọalọna ẹn nado wleawu nulẹ tọn dote.’ Davidi na akuẹ susu nado nọgodona azọ́n họ̀gbigbá tọn lọ. E dín azọ́nwatọ azọ́nyọnẹntọ lẹ mọ. E bẹ fataka po sika po pli bosọ biọ dọ owhlẹ Kedali tọn lẹ ni yin hinhẹnwa sọn Tile po Sidoni po. Sẹpọ vivọnu gbẹzan etọn tọn, Davidi ze yẹdide tẹmpli lọ tọn he Sọlomọni na yizan to họ̀gbigbá lọ whenu lẹ jo na ẹn. E dọmọ: ‘Jehovah wẹ dọ ma kàn onú ehelẹ dai na we. Jehovah na gọalọna we. A dibu blo. Yin huhlọnnọ bo jẹ azọ́n ji.’