Sang napatay si Saul, nangin hari si David. Treinta anyos sia sadto. Nagligad ang pila ka tuig sang iya paghari. Isa ka gab-i, nakita niya halin sa atop sang iya palasyo ang isa ka guapa nga babayi. Nabal-an ni David sang ulihi nga ang iya ngalan amo si Bat-seba kag asawa sia sang soldado nga si Urias. Ginpakadto ni David si Bat-seba sa iya palasyo. Naghulid sila nga duha, gani nagbusong si Bat-seba. Gintinguhaan ni David nga taguon ang iya ginhimo. Ginsilingan niya ang iya heneral nga ibutang si Urias sa unahan sang inaway kag dayon bayaan sia. Sang napatay si Urias, ginpangasawa ni David si Bat-seba.

Pero nakita ni Jehova ang tanan nga malain nga natabo. Ano ang himuon niya? Ginpakadto ni Jehova si manalagna Natan kay David. Si Natan nagsiling: ‘Ang isa ka manggaranon madamo sing karnero, kag ang imol may isa ka gamay nga kordero nga palangga gid niya katama. Ginkuha sang manggaranon ang kordero sang imol.’ Naakig si David kag nagsiling: ‘Dapat patyon ina nga manggaranon!’ Dayon nagsiling si Natan kay David: ‘Ikaw inang manggaranon nga tawo!’ Nasubuan gid si David, kag gin-aku niya kay Natan: “Nakasala ako kay Jehova.” Bangod sini nga sala, madamo sing malain nga natabo kay David kag sa iya pamilya. Ginsilutan ni Jehova si David, pero wala niya sia ginpatay bangod wala sia nagbutig kag mapainubuson sia.

Gusto ni David nga magpatindog sing templo para kay Jehova, pero ginpili ni Jehova ang bata ni David nga si Solomon sa paghimo sini. Ginpreparar ni David ang mga kinahanglanon para kay Solomon kag nagsiling: ‘Dapat mangin matahom gid katama ang templo ni Jehova.  Bata pa si Solomon, pero buligan ko sia nga ipreparar ang mga kinahanglanon.’ Nag-amot si David sang iya daku nga kuarta para sa pagpatindog. Nangita sia sing eksperto nga mga trabahador. Nagtipon sia sing bulawan kag pilak, kag nagpakuha sing mga sedro halin sa Tiro kag Sidon. Sang lapit na lang mapatay si David, ginhatag niya kay Solomon ang mga plano sa pagpatindog sang templo. Nagsiling sia: ‘Ginpasulat ini ni Jehova sa akon para sa imo. Buligan ka ni Jehova. Indi ka magkahadlok. Magpakabakod ka kag sugdi na ang pagpatindog sini.’