Saul tja za nokuṱa, David wa rira ombara. Eye wa ri nozombura 30. Mongurova imwe kombunda yokurira ombara ozombura ozonḓiṱi, David wa muna omukazendu omuwa tjinene okuza komututu wondjuwo ye youhona. David wa raerwa kutja omukazendu ngwi oBatseba, nokutja eye wa ri omukazendu womurwe wena Urija. David wa raa kutja Batseba ma etwe kondjuwo ye youhona. Owo va tjita orukatuko nu Batseba a rire otjingundi. David wa kondja okuhoreka oviṋa mbya tjita mbi. Eye wa raera omuhongore we wovita kutja nga twe Urija komurungu motjirwa nowo ve yaruke ombunda. Urija tja za nokuṱa motjirwa hi, David arire tja kupu Batseba.

Posiya Jehova wa muna oviṋa ovivi mbya tjitwa mbyo. Eye nambano ma tjiti vi? Jehova wa hinda omuprofete Natan ku David. Natan wa tja: ‘Pa ri omurumendu omutumbe ngwa ri nozonḓu ozengi nomurumendu omusyona ngwa ri nonḓu imwe uriri nu ndja suverere tjinene. Omurumendu omutumbe ngwi wa kambura onḓu yomusyona ndji.’ David wa pindikire tjinene na tja: ‘Omurumendu omutumbe ngo ma sokuzepewa tjiri!’ Natan wa raera David a tja: ‘Omurumendu omutumbe ngo oove!’ David wa hihamwa omutima tjinene a yakura ondjo ye na tja: ‘Mba tjiti ourunde komurungu waJehova.’ Ourunde mbwi wa eta ouzeu ouingi ku David neṱunḓu re arihe. Jehova wa vera David posiya we mu esa kutja ma hupe orondu wa ri nouatjiri nu wa ri omurisusuparise.

David wa vangere okutungira Jehova ondjuwo ondjapuke, nungwari Jehova wa toorora Salomo, omuzandu waDavid, okuitunga. David wa uta okurongerisira Salomo oviṋa na tja:  ‘Ondjuwo yaJehova ondjapuke mai sokurira ombwa tjinene. Salomo ngunda omuṱiṱi, posiya ami me mu vatere okurongerisa oviṋa.’ David wa yandja ovimariva ovingi koviungura vyokutunga ondjuwo yaJehova. Eye wa muna ovandu mbe nondjiviro ombwa yokutunga. Eye wa woronganisa ongoldo nosilveri, na eta omiti vyotupapa okuza koTirus na koSidon. Komaandero womuinyo we, David wa raera Salomo kutja ondjuwo ondjapuke yaMuhona mai sokutungwa vi. Eye wa tja: ‘Jehova we ndji raera kutja mbi tjange oviṋa mbi mena roye. Jehova me ku vatere. O tira otjiṋa. Yanḓipara nu u ute noviungura.’