Pengudah Saul mati, David nyadi raja lebuh iya beumur 30 taun. Udah beberapa taun iya nyadi raja, iya ngereja penyalah ti besai. Ba siti malam, iya tepedaka seiku indu ke bajik gamal ari perabung istana iya. David nemu nama indu nya Batseba lalu iya jadi enggau seiku soldadu ke benama Uriah. David mai Batseba datai ngagai istana iya. Iya lalu beleman enggau Batseba. Batseba lalu betubuh-bisi. David nguji deka ngelalaika penyalah ke udah digaga iya. Iya ngasuh kepala soldadu ngengkahka Uriah ba mua lebuh beperang lalu nyurutka diri ke belakang. Udah Uriah mati ba perang, David jadi enggau Batseba.

Tang Jehovah meda semua utai jai ti udah nyadi. Nama deka digaga Iya? Jehovah ngasuh nabi Natan betemu enggau David. Ku Natan bejaku enggau iya: ‘Seiku orang ke kaya bisi mayuh bedus, tang seiku orang ke seranta semina bisi seiku anak domba ke amat dikerinduka iya. Orang ke kaya nya lalu ngambi anak domba lelaki ke seranta nya.’ David ringat lalu ku iya: ‘Lelaki ke kaya nya patut dibunuh!’ Natan lalu nyaut: ‘Nuan meh orang kaya nya!’ David amat tusah ati, lalu ngaku penyalah iya ngagai Natan: ‘Aku udah bedosa ngelaban Jehovah.’ Penyalah David mai mayuh penusah ke sida sebilik. Jehovah ngukum David tang nejuka iya idup laban iya lurus sereta baruh ati.

David deka nirika rumah sembiang ke Jehovah, tang Jehovah milih anak David, Solomon nirika rumah sembiang nya. David berengkah ngulihka perengka kena nirika rumah sembiang nya lalu  ku iya: ‘Rumah sembiang ke Jehovah patut ti pemadu manah. Solomon agi biak tang aku deka nulung iya nyediaka semua perengka.’ David meri mayuh duit iya empu kena nirika rumah sembiang. Iya tetemuka orang ke landik ngereja pengawa. Iya ngumpul emas enggau pirak lalu mai kayu sidar ari menua Tire enggau Sidon. Sebedau iya mati, David meri Solomon pelan kena nirika rumah sembiang. Ku iya: ‘Jehovah ngasuh aku nulis semua utai tu ke nuan. Jehovah deka nulung nuan. Nuan enda tau enda kering sereta berani. Berengkah meh gawa.’