Mgbe Sọl nwụrụ, Devid ghọrọ eze. Devid dị afọ iri atọ mgbe ahụ. Mgbe afọ ole na ole gachara, ọ nọ n’ụlọ elu ya n’abalị hụ otu nwaanyị mara ezigbo mma. Devid chọpụtara na aha ya bụ Bat-shiba, nakwa na ọ bụ nwunye otu onye agha aha ya bụ Yuraya. Devid ziri ozi ka Bat-shiba bịa n’ụlọ ya. Mgbe ọ bịara, ha kwara iko, Bat-shiba atụrụ ime. Devid zochiri ihe a o mere. Ọ gwara onyeisi ndị agha ya ka o tinye Yuraya n’ihu ihu ebe agha kacha sie ike, ma si n’ebe ọ nọ laa azụ. E gburu Yuraya, Devid alụwazie Bat-shiba.

Ma Jehova hụrụ ihe ọjọọ a niile merenụ. Gịnị ka ọ ga-eme? Jehova ziri otu onye amụma aha ya bụ Netan ka ọ gaa hụ Devid. Netan gwara Devid, sị: ‘E nwere otu ọgaranya nwere ọtụtụ atụrụ, nweekwa otu ogbenye nwere naanị obere nne atụrụ ọ hụrụ n’anya nke ukwuu. Ọgaranya ahụ weere nne atụrụ nke ogbenye ahụ.’ Mgbe Netan gwachara ya ihe a, Devid were iwe ma sị: ‘Ọgaranya ahụ kwesịrị ọnwụ.’ Netan gwaziri Devid, sị: ‘Ọ bụ gị bụ ọgaranya ahụ.’ Ihe a wutere Devid, ya agwa Netan, sị: ‘Emehiela m Jehova.’ Mmehie a Devid mere wetaara ya na ezinụlọ ya ọtụtụ nsogbu. Jehova tara Devid ahụhụ, ma o gbughị ya n’ihi na o kwuru eziokwu ma dịrị umeala n’obi.

Devid chọrọ ịrụrụ Jehova ụlọ nsọ, ma Jehova họọrọ nwa ya nwoke aha ya bụ Solomon ka ọ rụọ ya. Devid malitere  ịkwadebere Solomon ihe ndị ọ ga-eji arụ ya. Ọ sịrị: ‘Ụlọ nsọ Jehova ga-adị ebube. Solomon ka bụ nwata, ma m ga-enyere ya aka ịkwadebe ihe ndị ọ ga-eji arụ ya.’ Devid nyere nnukwu ego a ga-eji arụ ụlọ nsọ ahụ. Ọ kpọtara ndị nwere aka ọrụ. O wetara ọlaọcha na ọlaedo. E sikwa n’obodo Taya na Saịdọn butere Devid osisi sida. Mgbe oge ọnwụ ya na-eru nso, o nyere Solomon akwụkwọ kwuru otú a ga-esi rụọ ụlọ nsọ ahụ. Devid kwuru, sị: ‘Jehova gwara m ihe ndị a m deere gị. Jehova ga-enyere gị aka. Atụla egwu. Ka obi sie gị ike, bidokwa ọrụ.’