DILONGI 43
Disumu ya Ntotila Davidi
Ntangu Saule fwaka, Davidi kumaka ntotila. Yandi vandaka ti bamvula 30. Na nima ya kuyala mwa bamvula, kilumbu mosi, yandi monaka nkento mosi ya kitoko katuka na ludi ya nzo na yandi. Davidi zabaka nde zina na yandi Bat-sheba mpi yandi vandaka nkento ya soda mosi, zina na yandi Uria. Davidi songaka bantu na kunata Bat-sheba na nzo na yandi. Bo vukisaka nitu, ebuna Bat-sheba bakaka divumu. Davidi mekaka kubumba diambu yina yandi salaka. Yandi songaka zenerale na yandi na kutula Uria na ndonga ya ntete na bitumba mpi basoda yina vandaka na nima na yandi bikisaka yandi, yandi mosi. Ntangu Uria fwaka na bitumba, Davidi kwelaka Bat-sheba.
Kansi Yehowa monaka mambu yonso ya mbi yina salamaka. Inki yandi zolaka kusala? Yehowa tindaka profete Natani na Davidi. Natani tubaka nde: ‘Mvwama mosi vandaka ti mameme mingi, mpi nsukami mosi vandaka kaka ti ka dimeme mosi yina yandi vandaka kuzola mingi. Mvwama bakaka dimeme ya nsukami.’ Davidi waka makasi mpi tubaka nde: ‘Beto fwete fwa mvwama yina!’ Ebuna Natani songaka Davidi nde: ‘Mvwama yango kele nge!’ Ntima ya Davidi pasukaka, mpi yandi ndimaka kifu na yandi na ntwala ya Natani: ‘Mono me sala disumu na ntwala ya Yehowa.’ Disumu yina natilaka Davidi ti dibuta na yandi mavwanga mingi. Yehowa pesaka Davidi ndola, kansi yandi bikaka Davidi na luzingu sambu Davidi vandaka masonga mpi ya kudikulumusa.
Davidi vandaka na nzala ya kutungila Yehowa tempelo, kansi Yehowa ponaka Salomo mwana ya Davidi na kutunga tempelo yina. Davidi yantikaka kuyidika bima sambu na Salomo mpi tubaka nde: ‘Tempelo ya Yehowa fwete vanda kitoko mingi kibeni. Salomo kele ntete mwana, kansi mono ta sadisa yandi na kuyidika bima.’ Davidi pesaka mbongo mingi sambu na kisalu yina ya kutunga. Yandi zwaka bantu yina zabaka kisalu mbote-mbote. Yandi vukisaka wolo mpi arza, mpi yandi nataka mabaya ya sedre katuka na Tire mpi na Sidoni. Pene-pene ya nsuka ya luzingu na yandi, Davidi pesaka Salomo bapula ya kutunga tempelo. Yandi tubaka nde: ‘Yehowa me sonikila nge mambu yai. Yehowa ta sadisa nge. Kuwa boma ve. Vanda ngolo mpi sala kisalu.’
“Muntu yina ke bumba mambi na yandi ta nunga ve, Kansi muntu yina ke funguna yo mpi ke yambula yo, bo ta wila yandi mawa.”—Bingana 28:13
Nge Lenda Sepela Mpi Ti
BAVIDEO
Davidi Tudilaka Nzambi Ntima
Davidi salaka bifu mingi na luzingu na yandi mpi yandi kutanaka ti bampasi mingi kansi yandi landaka kaka kusadila Nzambi. Mbandu na yandi ya mbote lenda sadisa nge na kubikala ya kwikama.
