Vava Saulu kafwa, Davidi wakituka se ntinu. Mvu 30 kakala miau. Mvu miayingi miviokele kala tuka kayantikila yala. Lumbu kimosi muna fuku, Davidi wamona mote a nkento tuka vana nludi a nzo andi. Davidi wawá e nsangu vo e nkumbu a nkento ndioyo Bate-seba, wasompwa kwa soladi dimosi diakala ye nkumbu Ureya. Davidi wabokelesa Bate-seba kuna nzo andi. Wavukana yandi yo kunyimitisa. Davidi wavava sweka e sumu kavanga. Wavovesa mfumu a makesa mandi vo kasia Ureya kuna ntwal’a mvita yo kunsisa yandi mosi. Vava Ureya kavondwa kuna mvita, Davidi wasompana yo Bate-seba.

Kansi, Yave wamona mawonso mambi mavangama. Adieyi kavanga? Yave watuma Natani wa ngunza kwa Davidi. Natani wavova vo: ‘Vakala ye mvuama mosi wakala ye mameme mayingi, yo nsukami wakala ye mwan’a meme dimosi kaka dina katoma zolanga. Kansi, o mvuama wakutumuna e meme dimosi kaka dia nsukami.’ Davidi wafunga kikilu makasi yo vova vo: ‘O mvuama ndioyo kafwete vondwa.’ I bosi, Natani wavovesa Davidi vo: ‘O mvuama ndioyo i ngeye.’ Davidi wakendalala kikilu yo vovesa Natani vo: ‘Nsumukini Yave.’ E sumu diadi mpasi zayingi diatwasila Davidi ye esi nzo andi. Yave watumba Davidi, kansi wayambula vo kakwamanana zinga kadi nkwa ziku yo lulembamu kakala.

Davidi wazola tungila Yave tempelo. Kansi, Yave wasola Solomo wa mwan’a Davidi kimana katunga e tempelo yayi.  Davidi wayantika kubika e lekwa ina Solomo kevua o mfunu yo vova vo: ‘E tempelo a Yave ifwete kala ya nkembo. Solomo wakinu nleke, kansi ikunsadisa yo kunkubikila e lekwa.’ Davidi wavana nzimbu zayingi mu tungila e tempelo. Wavava wantu ana batoma zaya e salu kia tunga. Wakutika wolo ye palata ye mabaya matuka kuna Turo ye Sidone. Vava kiafinama lufwa lwandi, Davidi wazayisa Solomo una kafwete tungila e tempelo. Wamvovesa vo: ‘Yave wampovese vo yasoneka mambu mama mu kuma kiaku. Yave okusadisa. Kumoni wonga ko. Kala yo nkuma yo kuyivana muna salu.’