Saule hanaashwile, Davida aba yena mulena. Naanani lilimo ze 30. Hasaabusize ka lilimo zeñata, zazi leliñwi inze ainzi fahalimwaa ndu yahae, abona musali yomunde. Davida atalusezwa kuli libizo la musali yo neli Bati-sheba ni kuli naanyezwi ki Uria yanaali lisole. Bati-sheba atiswa kwa ndu ya Davida. Davida alobala ni Bati-sheba, mi aitwala. Davida naapatile mafosisa anaaezize. Abulelela muzamaisi wa mpi yahae kubeya Uria kwapili kone ikolotela hahulu ndwa mi kihona bakakutela mwamulaho wahae. Uria hasaabulailwe mwa ndwa, Davida anyala Bati-sheba.

Kono Jehova naaboni lika kaufela zemaswe zeneezahalile. Ki lika mañi zanaaka eza? Jehova aluma mupolofita Natani ku Davida. Natani kihaa li: ‘Muuna wa mufumi naanani lingu zeñata, kono muuna wa mubotana naanani feela ngunyana iliñwi ili yanaalata hahulu. Muuna wa mufumi aanga ngunyana ya mubotana.’ Davida naahalifile hahulu mi ali: ‘Muuna wa mufumi yo ulukela kushwa!’ Cwale Natani kihaa li ku Davida: ‘Ki wena muuna wa mufumi yo!’ Davida naaikutwile hahulu bumaswe, mi aitumelela mafosisa ahae ku Natani, ali: ‘Nifoselize Jehova.’ Sibi sanaaezize nesitahisize kuli yena ni lubasi lwahae bakene mwa butata. Jehova afa koto Davida kono amutuhelela kupila kakuli naasepahala mi naaikokobeza.

Davida nabata kuyahela Jehova tempele, kono Jehova aketa mwanaa hae wamushimani ili Salumoni kuyaha tempele. Davida akala  kulukiseza Salumoni lika zanaaka tokwa kuli ayahe tempele, mi kihaa li: ‘Tempele ya Jehova iswanela kuba yende hahulu. Salumoni usali mwanana, kono nika mutusa ka kumulukiseza za kuitusisa.’ Davida naazusize masheleñi amañata kuli musebezi wa kuyaha uzwelepili. Naafumani babeleki babaziba hande musebezi. Atisa gauda ni silivera, ni likota za sidare kulizwisa kwa Tire ni Sidoni. Davida hanaatuha ashwa, afa mwanaa hae Salumoni mulalo wa mwakuyahela tempele. Kihaa li: ‘Jehova naanitaluselize kuli nikuñolele lika ze. Jehova ukakutusa. Usike wasaba. Utiye mi ueze musebezi.’