Tej tkyim Saúl, a David ok qʼoʼn te aj kawil. Qʼiʼntoq 30 abʼqʼi tuʼn. Tej tikʼ mas abʼqʼi, toj jun qonikʼen ok tqʼoʼn David twitz tiʼj jun tbʼanel xuʼj tzmax twiʼ ja jatumel in kawintoq. Ok tbʼiʼn David qa Bat-seba tbʼi xuʼj ex qa mejebʼni tukʼil jun soldad Urías tbʼi. Xitzun tqʼoʼn David tqanil tuʼn tpon Bat-seba toj ja jatumel in kawintoq. Kubʼtzun kuẍe David tukʼil Bat-seba ex ok ten tal. Ok tilil tuʼn David tuʼn tkubʼ tewin aju otoq bʼant tuʼn. Tuʼntzunju, xi tqʼamaʼn teju nejenel kyxol soldad tuʼn tkubʼ nej Urías toj qʼoj, ex yajxitl tuʼn kyel oq tiʼj tuʼntzun tkyaj ten tjunalx. Kyim Urías toj qʼoj aju, ex yajxitl kubʼ mojeʼ David tukʼil Bat-seba.

Noqtzun tuʼnj, otoq tzʼok tqʼoʼn Jehová twitz kyiʼj nya bʼaʼn otoq bʼaj. ¿Tiʼ kbʼantel tuʼn Jehová jaʼlo? Xi tsamaʼn Natán, aju tsanjel, yolil tukʼil David. Tqʼama Natán jlu te David: «Attoq jun xjal qʼinun ex attoq nim tẍneʼl, ex attoq jun prow xjal ex oʼkx jun tal t-ẍneʼl attoq, ex kʼujlaʼnxix tuʼn. Eltzun tiʼn xjal qʼinun oʼkxku jun tal tẍneʼl prow xjal». Tzaj nim tqʼoj David ex tqʼama: «Aju xjal ma bʼant tuʼn ikju, bʼaʼn tuʼn tkyim». Xitzun tqʼamaʼn Natán jlu: «Aya aju xjal lu». Tzaj nim tbʼis David ex xi tqʼamaʼn jlu te Natán: «Ma chin bʼinchane il twitz Qman». Tzaj nim nya bʼaʼn tiʼj David ex kyiʼj toj tja tuʼn il otoq kubʼ tbʼinchaʼn. Kubʼ tqʼoʼn Jehová tkastiw pero kukx xi tqʼoʼn ambʼil tuʼn tanqʼin tuʼnju tqʼama axix tok yol ex mintiʼ jaw tnimsan tibʼ.

Tajtoq David tuʼn tjaw tbʼinchaʼn jun ja te Jehová. Noqtzun tuʼnj, jaw tjyoʼn Jehová Salomón, aju tkyʼajal David, tuʼn tjaw tbʼinchaʼn ja. Oktzun ten David bʼinchal qe tiʼchaq tuʼn t-xi tqʼoʼn te Salomón ex  tqʼama: «Aju tja Jehová kjawil bʼinchet, kʼokel te tbʼanilxix. Tzma kuʼxun Salomón, kyjuʼtzun, chin onile tiʼj tuʼn tbʼaj bʼinchet tkyaqil». Xi tqʼoʼn David nim tpwaq te oyaj tuʼn tjaw bʼinchet ja. Tzaj tjyon qe tbʼanel aqʼunal, jaw tchmoʼn qʼan pwaq ex saq pwaq, ex tzaj tiʼn tzeʼ cedro te tnam Tiro ex Sidón. Tej chʼixtoq tkyim David, xi tqʼoʼn qe uʼj te Salomón tzeʼn tuʼn tjaw bʼinchet tja Dios ex xi tqʼamaʼn te: «O tzaj tqʼoʼn Jehová qe tqanil lu weye tuʼn tkubʼ ntzʼibʼine ex tuʼn t-xi nqʼoʼne teya. Tzul onina tuʼn. Miʼn tzaj xobʼa. Tenx tipuna ex kyuwx tkʼuʼja».